Kløpparar med klopp

Ein dugnadsgjeng frå Jondal Idrettslag har brukt 70 timar på byggja ein 80 meter lang gangbru på stokkar – ei såkalla klopp – over Storemyr. Brukte telefonstolpar, plankar og lekter er snikra saman slik at ivrige fjellvandrarar kan gå utan å verta våt på beina. Gangvegen vert ein del av tur nummer 33 frå Kysnes til Grønrimb. Han er ein av dei 38 merkte turane i jondalsfjella.

Marit Hesvik har sel på Kysnesstølen, som ho kallar Grønrimb, og nyttar ofte stien. Ifylgje Hesvik er Storemyr, som namnet tilseier, ei stor myr ein må over for å koma opp til dei 16 hyttene på stølen. Det våte området er om lag 80 meter langt og ganske breitt, ifylgje Hesvik.

– Når det regnar, må ein ha støvlar på seg for å koma over. Dei fleste nyttar fjellsko når dei går på tur, men då vert ein våt på beina når ein går over myra. Det er dumt å måtte gå med støvlar heile turen når det berre er dette stykket ein treng dei, seier Hesvik.

– Ein kjenner seg velkomen

Ho har fleire gonger tenkt at det hadde vore praktisk med ein veg for å koma tørrskodd over. I fjor haust bestemte ho seg for at det i år skulle verta noko av planane.

– Eigentleg hadde mannen min og eg tenkt å gjera arbeidet sjølve. Sidan alle materialar må fraktast opp med helikopter, vart det for kostbart for oss. Difor spurde eg idrettslaget, som tente på ideen, fortel Hesvik.

Hesvik likar å gå tur i fjellet, og har vitja mange stader der det er lagt til rette for turgåarar. Til dømes er det fleire stadar i Kvinnherad lagt til rette mellom anna med tau til å halda seg i, trapper og gangbruer. Difor ynskte ho å gjera det same på Storemyr.

– Ein kjenner seg velkomen når nokon har tenkt på at du skal ha det trygt når du går. Det er kjekt å leggja til rette for at folk som går, skal ha det fint på tur, seier Hesvik.

Idrettslaget søkte om pengar og planen var å gå i gang med prosjektet på våren. I sluttrapporten som idrettslaget har sendt kommunen, kjem det fram at arbeidet vart seinka. Hesvik fortel at materialane vart flydde på plass 15. juni.

– Det synte seg at arbeidet vart noko meir omfattande enn det som gjekk fram av søknaden, slik at ein fekk bruk for meir materialar med tilhøyrande ekstra helikoptertransport, står det i rapporten.

Gåver og tilskot

Dugnadsgjengen på sju venta til det var helikopter i området, og fekk difor lågare fraktutgifter. 17. august sette dei i gang med dugnadsarbeidet. Gangbanen er laga av tre impregnerte plankar skrudde ved sida av kvarandre med fem centimeter mellomrom. Breidda på gangbanen er 70 centimeter. Som underlag er det brukt impregnerte telefonstolpar som er delte opp. Desse var ei gåve frå Hardanger Energi AS, fortel Hesvik. På toppen av plankane er det skrudd fast lekter som sklisikring.

– Me vart ikkje heilt ferdige i august, men har fullført resten etterpå. No er alt ferdig, men det vert inga offisiell opning. Dei som vil, kan ta det i bruk. Det er kjekt å gjera noko for andre, seier Hesvik.

Idrettslaget har fått eit tilskot på 20.000 kroner som del av prosjektet friluftshovedstaden i Ullensvang kommune. Sparebankstiftinga Hardanger har gjeve ei gåve på 34.275 kroner. Sjølv om materialane vart dyrare enn planlagt, har prosjektet eit overskot på 3.058 kroner. Ifylgje rapporten skal pengane gå inn på tur- og merkjegruppa i Jondal idrettslag sitt budsjett for vedlikehald av dei merkte turløypene i Jondal.