Klimaendringane vil gi kraftig inntektsvekst for småkraftverk

Analysen er utført av professor og klimaforskar Asgeir Sorteberg ved Universitetet i Bergen i samarbeid med Christian Tesdal i Småkraft AS.

Småkraft eig og driftar nær 160 kraftverk i samarbeid med 800 grunneigarar og er Europas største småkraftprodusent.

Sorteberg har tatt utgangspunkt i 46 småkraftverk over heile landet. I snitt vil klimaendringane auke dei årlege inntektene med 29 prosent. Føresetnaden er at straumprisane held seg på om lag same nivå som dei siste åra.

Meir nedbør og varme

I analysen har han lagt inn klimaframskrivingar og NVEs modell for avrenning og vassføring.

– I dag skjer ein svært stor del av produksjonen i mai og juni i samband med snøsmeltinga. Mange småkraftverk er lite produktive om vinteren og står nesten heilt stille då. I framtida vil det komme meir nedbør samstundes som det blir varmare. Det inneber at meir nedbør vil komme som regn i staden for snø, og produksjonen vil fordele seg jamnare utover året, forklarer Sorteberg.

Sorteberg har også vurdert om småkraftverka har store nok røyrdimensjonar til å ta unna den auka vassføringa. Svaret er at dei i stor grad vil klare å utnytte dei større vassmengdene.

Jamnare produksjon

I tillegg til auka produksjon får småkraftverka også ein ekstragevinst ved at dei vil kunne produsere meir om vinteren når prisane jamt over er høgare.

– I den store samanhengen utgjer produksjonen frå småkraftverka så lite at det neppe vil slå ut på prisen. Den blir avgjort av dei store aktørane i Noreg og på kontinentet, seier Sorteberg.

Store variasjonar

Sjølv om småkraftverka i snitt vil kunne auke inntektene med nær 30 prosent, er det store variasjonar frå kraftverk til kraftverk.

Det største potensialet ser ut til å vere blant småkraftverk på Vestlandet, der inntektsauken kan bli over 50 prosent, medan klimagevinsten ser ut til å bli mindre for småkraftverk i innlandet og nord i landet.

Plasseringa er avgjerande

Administrerande direktør Terje Vedeler i Småkraft er glad for at klimaendringane slår positivt ut, men har merka seg kor ulikt det kan slå ut frå stad til stad.

– Totalt sett blir det ein inntektsvekst. Men kor stor klimagevinsten blir, avheng av kor du har kraftverka dine. Vi vil først og fremst nytte denne kunnskapen til å finne ut kor det vil vere lurt å bygge nye småkraftverk framover, seier han.

Han legg til at produksjonen naturleg varierer mykje frå år til år.

– I 2020 var det eit svært vått år, i år har det vore tørt. Slike svingingar frå år til år får stor innverknad på produksjonen og vil nok påverke oss vel så mykje som klimaendringane, seier han.