Klarte å heva «Rover»
Måndag vart MS «Rover» heva og slept vekk frå Norheimsund.
IMC Diving AS utførte jobben med mobilkranhjelp frå Sten Gravdal Transport AS og Jan Mo AS.
Prosjektleiar Janne-Pekka Toija i IMC Diving AS seier at alt gjekk som planlagt.
– Det gjekk veldig bra. Me møtte ikkje på andre utfordringar enn me pleier, seier Toija.
Arbeidet med hevinga starta måndag morgon, og om lag klokka 18.30 vart båten slept ut frå Norheimsund. 17 timar seinare var båten framme ved Hanøytangen på Askøy.
– Eg veit ikkje kva som skjer vidare med båten. Det er opp til kommunen. Eg vil tru han vert hogd opp, seier Toija.
Båten har lege i sjøen sidan 17. januar. Malin Namdal, branninspektør og sakshandsamar i Kvam brann og redning, seier at det er godt å få vekk båten.
– I utgangspunktet er eigar ansvarleg for kostnaden med heving, sleping og destruering. Det har me eit vedtak på, men det er ikkje klart om det er eg eller juristen som skal fylgja det opp, seier Namdal.
Sjå bilete frå hevinga:
Her kan du sjå MS «Rover» reisa frå Kvam:
