Klart for utviding av tilbodet på Blekeld

Tiltaka til Øystese jeger- og fiskarlag skapa ingen kontrovers då planutvalet samrøystes velsigna dei med ein dispensasjon 21. juni.

Even Øyri (Ap) meiner dugnadsgjengen bak tiltaket gjer mykje godt for ålmenta. Med dei nye tiltaka opnar ein for at fleire grupper kan bruka området, påpeika han.

Planen til laget er å reisa eit grindverksbygg, ei lita lagerbu og eit padleanlegg med slipp av betongelement. Den eksisterande utrustinga for å flytta rullestolar frå bryggja til båten, som ikkje lenger vert rekna som forsvarleg, skal fjernast og erstattast med ein båt med lem i baugen.

Tiltaka krev dispensasjon frå landbruks-, natur- og friluftsføremålet i kommuneplanen. Rådmannen og politikarane meiner at tiltaka ikkje råkar omsyna bak føremålet, men har stor samfunnsnytte og supplerer eit flott anlegg som fremjar friluftsliv for alle. Søkjaren gjer ein flott innsats med kultivering av vatnet og tilsyn, heiter det i sakspapira.

Dispensasjonen er gjeven på fleire vilkår. Mellom anna kan ikkje tiltaka ha vassforsyning eller føra til utslepp til Fitjadalsvatnet, som vert vurdert som reservedrikkevasskjelde.

Kvam herad er grunneigar. Laget har ein leigeavtale med heradet.