Klart for tunge løft

5.30 var Neteland på plass. Klokka 6 sleppte ho inn den aller første medlemen.

Når HF er innom klokka 16, fortel dei to kvinnene at det har vore folk innom gjennom heile dagen, for å melda seg inn, prata eller berre sjå seg om. På dei første ti timane har kring 30 meldt seg inn.

– Me har vore spente. Folk er interesserte, men det er eit steg frå interesse til medlemskap, seier Berge.

Det er korkje kake eller raude band å sjå i dei grønmåla lokala. Taktikken har vore å opna litt i det stille, for å ta omsyn til seg sjølve, til gjestene og til koronaviruset.

Indre del av lokalet, bak ei stor skyvedør, ber framleis preg av oppussing. Spinningsal og rosal skal etter planen verta klare i løpet av vinteren.

Lite knirking, litt anna støy

Attrå tok over lokala 1. august. Den siste månaden har bydd på mykje arbeid, nokre vakenetter og lite tid til anna for Neteland og Berge.

– Det tøffaste har vore at me ikkje har hatt tid til å trena, seier Neteland.

Det har vore mange kokkar, nokre økonomiske humpar og bekymring for å komma i mål, men alt i alt har arbeidet gått relativt knirkefritt, seier dei to, som meiner dei utfyller kvarandre. Neteland slår fast at dei har planlagt godt.

– Ingen har slåst, og me har alle tennene på plass. Me må takka mennene våre for god hjelp. Og så har ein litt dårleg samvit overfor borna, seier Berge.

Då utstyret var komme på plass, viste eit anna problem seg: Lyden frå tredemøller og frivekter spreidde seg frå golvet til veggene i det gamle betonghuset, og lyden kunne høyrast hjå Hardingsaumen i etasjen under.

Løysinga vart å bygga opp golvet under utstyret.

– Me gjer det me kan for å ikkje plaga andre, seier Berge.

Storfint besøk

Berge gler seg over lokalet midt i sentrum.

– Det er mykje liv, mange folk som går forbi, og det er sosialt. Me ønsker å behalda og betra livet i sentrum. Trenden i samfunnet er at folk handlar mindre i butikkar og bruker meir tid på restaurantar, kafear og opplevingar, seier Berge.

Allereie veka før opninga fekk utstyret prøvekøyrt seg, og det var ikkje kven som helst som tok jomfruløfta: Det engelske langrennslandslaget, som hadde vore på trening på Folgefonna, fekk testa det splitter nye senteret. Det vart godkjent, seier Berge.

– Dei var veldig nøgde. Eg veit ikkje kor kravstore dei er, men utstyret me har kjøpt, er verdsleiande og heilt nytt, så det skal ikkje stå på dét, seier ho.

Sjølv om ikkje alt utstyret er på plass enno – meir skal inn i delen som framleis er under arbeid –, er det viktigaste på plass for å få trent dei store muskelgruppene, seier Berge.

Også garderobar og ein treningssal skal byggast på lengre sikt. Inntil vidare er éin garderobe med toalett, dusj og vask tilgjengeleg, pluss ei rekke med skap.