Klart for skulestart i Kvam

I år byrjar 90 elevar på VG1 ved Kvam vidaregåande skule. På studiespesialiserande er det éin klasse med 30 elevar. Teknologi- og industrifag (TIF) har heile 46 elevar fordelte på 3 klassar. Helse- og oppvekstfag og elektro- og datateknologi har høvesvis 17 og 16 nye elevar.

– Dette viser at det er god interesse for dei ulike linene, seier Matland.

Rektoren fortel at det er venteliste på fleire av programområda. Den mest populære lina er industriteknologi. Der var det 54 søkjarar, og det vert 3 fulle klassar på VG1. Inntakskontoret i Vestland fylkeskommune styrer inntaksprosessen fram til 1. september, men etter den datoen kan skulen sjølv ta inn elevar om det finst ledige plassar.

På VG2 studiespesialisering er det 50 elevar. Det inkluderer 22 elevar i ein USA-klasse, fortel Matland.

Gjennomføringa ved skulen er god. I år var det 87,8 prosent som fullførte teknikk- og industrifag, 85,7 prosent helse- og oppvekstfag, 81,8 prosent elektro og 81,7 prosent fullførte studiespesialisering.

Matland seier det er betre enn nasjonale trendar, men at han skulle sjølvsagt ynskja at tala var endå betre. Etter pandemien, då tala var unaturleg høge fordi det ikkje vart avvikla eksamen, har tala falle litt.

I statistikken ligg ein del elevar som har skifta studieretning.

Marknadsføring og rekruttering

For å rekruttera elevar til Kvam vidaregåande skule, har skulen vore aktiv på fleire frontar. Dei tilsette har delteke på ulike utdanningsmesser i regionen, inkludert Stor-Bergen. Gjennom slike tiltak har skulen forsøkt å trekkja til seg elevar frå kommunar utanfor det ein ser på som det naturlege opptaksområdet, som er Kvam, fortel Matland.

Skulen har lagt vekt på å framheva tilbod som er unike for skulen, som til dømes transport- og logistikklina, som få andre skular i området tilbyr. I tillegg har elevar frå skulen vore med på messene for å svara på spørsmål frå potensielle nye elevar, noko som har vore positivt for rekrutteringa.

Matland legg vekt på at skulen i Kvam har eit spesielt godt rykte innan teknologi- og industrifag, noko som har resultert i mange søknader. Skulen har eit godt samarbeid med lokalt næringsliv, og det styrkjer utdanningstilbodet ytterlegare, fortel Matland.

Dei nye elevane som startar på Kvam vidaregåande skule, vil snart få oppleva det nye skulebygget som er under oppføring. Ifølgje rektoren er planen at elevane på teknologi- og industrifag og elektro- og datateknologi skal flytta inn i verkstadene i løpet av vinteren. Han fortel og at dei som byrjar på studiespesialisering no, vil gå halve skuletida i dei nye lokala.

Gleda over skulestart

Matland ser fram til å verta kjend med nye elevar.

– Det kjekkaste med skulestart er å sjå forventingsfulle og lærelystne ungdommar koma til skulen, seier han.

Rektoren legg til at dersom nokon står utan skuleplass eller finn ut at dei kanskje har valt feil skule når dei kjem i gang om nokre veker, er det lov å ta kontakt med Kvam vidaregåande skule for å undersøkja om det finst ledige plassar.

– Det vil alltid vera litt rørsle i elevmassen dei første vekene, og somme gonger kan det finnast ledige plassar etter at skulen er i gang, seier Matland.

Skulestart på Framnes

Framnes Kristne Vidaregåande Skule har skulestart 17. august. Harald Voster, rektor ved skulen ser fram til å ta imot både nye og gamle elevar, og håpar å fylla dei 270 internatplassane som skulen har til rådvelde.

Før sommaren hadde 90 elevar takka ja til plass på VG1. Elevtalet vil vera avhengig av kor mange som faktisk møter opp etter ferien, men rektor håpar på å nå opp til dei 270 elevane som skulen har kapasitet til å ta imot. Skulen hadde opptak 1. mars, men tek imot søknader etter 1. mars. Desse søkjarane får ikkje svar før etter at skulen har starta.

Voster fortel at den kristne skulen i fjor hadde 30 elevar frå Kvam som var heimebuande. Han reknar med at dei kjem til å ha mellom 30 til 40 elevar i år òg.

Kva lokkar?

Det er fleire faktorar som dreg elevar til skulen, seier Voster. Han fortel at fleire finn skulen gjennom internett og YouTube, men dei beste ambassadørane er tidlegare elevar som spreier positive erfaringar om skulen. Internatet er noko som spesielt trekkjer til seg elevar frå utanfor Kvam, då det byr på ein spennande skulekvardag og eit godt miljø, meiner Voster.

– Elevundersøkinga viser at elevane er nøgde med miljøet på skulen, noko som bidreg til vårt gode rykte, seier Voster.

Skulen nyttar altså moderne kanalar på nettet for å rekruttera nye elevar. Han har slutta med tradisjonell avis- og papirreklame, og produserer sjølv alt innhaldet som vert publisert på nettet, seier Voster. Dette innhaldet omfattar filmar om kvardagslivet på skulen som vert publiserte på YouTube. Innimellom er det også elevar som bidreg med innhald, som til dømes ein elev som dokumenterte seg sjølv over ein periode for å visa korleis det er å vera ny på Framnes. Slikt kan vera kjekt for nye elevar å sjå, meiner Voster. I tillegg til digital marknadsføring reiser skulen rundt på rekrutteringsmesser og vitjar 9.-klassar.

Framnes tilbyr studiespesialisering med ulike liner, programfag og idrettsfag. Skulen har ein frivillig utanlandstur for elevar i 3. klasse, noko mange ser fram til. Elevane sparer til turen over tre år og for dei som ikkje deltek, vert skulepengane reduserte, fortel Voster. Han er usikker på kor mykje nett denne turen påverkar elevtalet, men understrekar at det er ein kjekk tur som skapar samhald.

– Eg gler meg til å møta dei nye elevane, og håpar på eit nytt skuleår fylt med læring, fellesskap og gode opplevingar for alle, seier Voster