Klare for fylkesfinale

Gladmeldinga nådde elevane i ei direktesending på NRK Hordaland måndag morgon. Skulen gjekk vidare til fylkesfinale saman med Nore Neset ungdomsskule i Bjørnafjorden, og Rå skole og Holen skole i Bergen. Finalen vert arrangert etter nyttår.

– Stor stas at me er vidare. Og me er sjølvsagt veldig stolte av dei flinke og smarte elevane i 10. klasse! skriv skulen på heimesida.

Ifylgje rektor Camilla Støen Bakke vart elevane heidra med sjokoladekake på morgonkvisten.

44 skular og til saman 132 elevar har vore med på tevlinga. Deltakarane frå Strandebarm skule er Elise Løken, Vegard Eide Aase og Heine Laupsa Haaland.

«Visste de at de var så gode?» spurde NRK i sendinga. «Ikkje eigentleg», svara elevane.