Klar melding: – Tidsbruken er forkasteleg

Det meiner styreleiar og fagleg leiar Ingvald Jensen hjå Bygger'n Jondal (BJ). Han greip sjansen til å seia frå då han hadde nærkontakt med utval for samfunn, plan og næring i Ullensvang. Dei folkevalde var nemleg på bedriftsvitjing på Belsnes før det ordinære møtet onsdag.

Inger Synnøve Vestrheim (H) ynskte å vita korleis ei verksemd som har mykje med byggjesakshandsamarar i den fire år gamle kommunen å gjera, opplever møtet med dei. Den invitasjonen greip Jensen med hud og hår.

– Tolk positivt der me kan!

– Frustrerande

Han opplyste at BJ har gått over til å nytta ein ekstern konsulent, Svein Jåstad, til å ta seg av søknadsprosessar, for å letta eige arbeid. Sjølv om vedkomande er driven i faget og meiner at sakene er godt opplyste, går det ifylgje Jensen veldig lang tid med til å svara på mangelbrev og stadig nye spørsmål. Mykje tid går med til «filleting», og tidsbruken er forkasteleg, sa han.

– Det er veldig frustrerande. Kundane våre forstår ikkje kvifor me ikkje kan koma i gang, sa Jensen, som sa at BJ nesten ikkje veit kva ein skal svara kommunen på alle spørsmåla.

Han etterlyste enklare former for kommunikasjon, til dømes i eit møte i staden for i brev. Slik kunne mange spørsmål vore avklara raskt, trur Jensen, som sa at BJ kan kjenna seg litt mistenkjeleggjord av kommunen.

– Me burde hatt ein positiv dialog om sakene, så hadde det gått smidig og greitt, i staden for å grava oss ned i kvar vår skyttargrav. Eg visste at med ei kommunesamanslåing ville det ikkje vera så lett som i Jondal. Det er kanskje rett i mange tilfelle, men det er grenser for kor vanskeleg ting kan gjerast. Det verkar nesten som om ein leitar etter feil. For å setja det på spissen: Ein leitar etter kommafeil, sa Jensen.

– Be om møte!

Kommunalsjef for kultur, næring og samfunn, Kristian Bondhus-Jensen, slo fast at kommunen bør ha møte når «ting begynner å dra seg til». Han påpeika samstundes at nokre detaljar i saker må avklarast for å hindra eventuelle problem seinare.

– Be om møte om de ser at noko er uforståeleg eller vanskeleg å forhalda seg til, oppmoda han.

Iselin Victoria Hammer, verksemdleiar for byggjesak, kart og oppmåling, landbruk, havbruk og skogbruk, oppmoda søkjarane om å be om førehandskonferansar for å koma betre ut frå start og sikra komplette søknader. Om ein opplever å få dei same tinga i retur, bør ein ha dialog om dei og få rydda bort desse feila, sa ho.

Jensen og fleire folkevalde påpeika at denne dialogen bør gå båe vegar og vera av det positive slaget.

Klarar seg godt

Verksemda på Belsnes, som starta så smått seint på 1940-talet og stegvis har vakse, har ni tømrarar og éin lærling, pluss tre tilsette på kontoret. I 2022 hadde ho ei omsetning på vel 34 millionar kroner. Ifylgje Jensen merkast dyrtida og høge renter også i byggjebransjen, men jondølingane har likevel klara seg godt.

Jondal Bygg AS, som det juridiske selskapet heiter, er altetande innan tømrararbeid. I tillegg til å byggja, utvida og rehabilitera hus og hytter, har ho gjort mykje arbeid mellom anna for Boliden i samband med dei enorme investeringane i industri på Eitrheimsneset. Jensen fortalde at han er nøgd med oppdragsmengda lokalt.

Den faglege leiaren vart spurd kva han meiner om nedlegging av byggfagtilbod på vidaregåande skular i Hardanger. Tilbodet i Steinsdalen i Kvam er lagt ned for lengst. I Odda kan det verta truga gjennom ein langsiktig plan for tilbodsstrukturen i Vestland. Torsdag kveld deltek representantar for både Kvam herad og Ullensvang kommune på eit høyringsmøte om saka på Voss.

Jensen meiner at det bør vera eit tilbod i Odda, sidan eit så stort område soknar til skulen.

– Men det må vera elevar til det, sa Jensen.