Klar melding om «eldrekutt»: – Ta vare på oss!

«Nei til rasering av eldreomsorga!»

«Måltal er teori, styr etter realitetane»

«Demensplan på høyring no!»

«Ta vare på oss»

«Redd plassane på Tolo omsorg!

Parolane på plakatane – vel å merka stort sett skrive med majusklar – tala sitt tydelege språk om kva bodskapen til dei folkevalde var.

Fem i kø, fem ledige

Eit politisk vedtak i juni om å ta det eine av to bygg med åtte omsorgsbustader på Tolo i Norheimsund ut av drift var bakteppet for at 60–70 personar – i hovudsak eldre og pårørande til eldre – stilte opp utanfor Kvam rådhus før heradsstyremøtet onsdag morgon. Ifylgje rådmannen er bustadene lite effektive i drift.

I formannskapsmøtet 19. september gjorde helse- og omsorgssjef Terje Langeland det kjent at fem omsorgsbustader på Tolo no står ledige, samstundes som fem personar står i kø for å få slik bustad. Men som fylgje av vedtaket, som ifylgje rådmannen skal spara heradet for tre millionar kroner i året, kan desse altså ikkje få plassane på Tolo.

Det er heller ikkje kjent kva dei tomme romma skal nyttast til i framtida, ettersom dette er del av arbeidet med ein større utbyggingsplan i pleie og omsorg som rådmannen framleis putlar med. Det som er sikkert, er at heradet som fylgje av eldrebylgja har sett seg som mål å gje 13 prosent av dei over 80 år tilbod om såkalla heildøgns omsorg. I dag er talet 16,8 prosent.

– Feil stad?

«Slitne pårørande = fleire sjukemeldingar» stod det på plakaten som Karin Sæleset og Kari Eikemo Skeie bar og målbar. Sæleset seier at ho stilte opp for å gje dei eldste ei røyst.

– Mine foreldre er døde, og fekk det dei trong i alderdomen, men me er der snart sjølve. Eg er veldig glad for at så mange forstår det, seier Sæleset.

Ho stod ved rådhuset med ei viss kjensle av at ho stod på feil stad.

– Det er jo framføre Stortinget me skulle ha stått. Politikarane slit med å prioritera og har avgrensa med midlar. Eg ser dilemmaet kommunane står i, seier ho.

Sæleset balar med å setja fingeren på kva som burde vore nedprioritert for å sikra meir pengar til eldreomsorg, og meiner staten burde ha sikra kommunane større spelerom.

– Eg synest det er veldig viktig at me har eit tilbod til dei eldre og ikkje byggjer det ned, seier Kari Eikemo Skeie.

– Kvar skal me henta pengane?

– Kanskje me kan skjera litt ned på konsulenthjelp og lita litt meir på at dei folkevalde veit kva som trengst. Hjelp er kanskje naudsynt av og til, men ikkje alltid.

– Kvifor var det viktig for deg å møta opp her?

– Fordi me må støtta dei som tek initiativ og visa at me bryr oss om kva som skjer.

– Folk vil bu heime

Bak «eldreopprøret» på morgonkvisten stod mellom andre Brita Træbakken, som er leiar for rådet for menneske med nedsett funksjonsevne og jamt over samfunnsengasjert. Ho seier at nedlegginga av einingar på Tolo omsorg vil få fylgjer for tilbodet elles.

Etter hennar syn må politikarane vakta seg for å lata kutta i Kvam råka dei eldre i for stor grad. Om ein byggjer ned tilbodet om omsorgsbustader, må tilboda i heimen styrkjast, formanar ho.

– Me må spara, me òg. Folk vil bu heime så lenge som mogeleg. Dei færraste ynskjer ein plass på institusjon, men av og til vert behovet slik at dei må. Om dei ikkje får plass på Toloheimen, må dei på sjukehus. Det er veldig dyrt, seier ho.

Helse- og omsorgssjef Terje Langeland orienterte i formannskapet førre veke om fleire mogelege utbyggingsstrategiar innan pleie og omsorg. Alternativa inneber til dømes nedlegging og utviding av dagens sjukeheimar og bygging av nytt helsehus.

Langeland la ikkje skjul på at fleire må bu lenger heime i framtida, og at folk i større grad må verta flinkare til å investera i eigne bustader for å leggja dei til rette for alderdomen. Det er ikkje Træbakken usamd i.

– Det er fornuftig å tenkja på alderdomen i tide. Å tenkja på tilpassa bustader og selja store bustader som er vanskelege å bu i og dyre å driva, er heilt rett, seier ho.

Sjå heile intervjuet med Brita Træbakken her:

Krev rapport

Demonstrasjonen førte ikkje til ei stor kursendring, men heradsstyret vedtok i samband med 2. tertialrapport å krevja at rådmannen i neste formannskapsmøte rapporterer om køen til omsorgsbustader og sjukeheimsplassar. Ho må dessutan rapportera om bruk av dei ledige bustadene på Tolo. Fleirtalskoalisjonen – Frp, Ap, V og KrF – stod bak framlegget.

Rådmann Anita Hesthamar vart utfordra av Sp til å seia noko om bruken allereie onsdag. Ho røpte at det kan verta aktuelt å flytta brukarar i helse og omsorg som i dag leiger andre, ueigna bustader, inn i dei ledige husværa på Tolo. Målet med eventuell flytting vil vera å hindra store investeringar i til dømes sprinklaranlegg. Helse og omsorg har ikkje «landa» enno, understreka rådmannen.

Ho påpeika at løysingane berre er mellombelse, og at bustadene ved Tolo omsorg etter planen skal nyttast til omsorgsføremål igjen seinare. Trongen kjem nemleg til å auka monaleg om ikkje mange år, som fylgje av demografien.

H fekk ikkje fleirtal, ettersom partia i fleirtalskoalisjonen røysta mot, for å påleggja rådmannen å vurdera kva dei økonomiske fylgjene vil vera å gjera halvparten av plassane på Tolo omsorg og på Strandebarm omsorg om til institusjonsplassar eller såkalla «omsorg+-bustader». Sistnemnde er omsorgsbustader med nattevakt og såleis omsorg døgeret rundt.