Klar melding frå KrF i skjenkjesak
– Arbeidsplassar kan ikkje trumfa menneskelege tragediar.
Det sa Jostein Moldsvor (KrF) før han og dei to partifellane røysta mot å gje skjenkjeløyve for øl og vin i ein pub og restaurant i Skummesalen i Øystese.
Han viste til at alkohol gjev store skadar, mange tragediar og store samfunnskostnader. Dess enklare tilgangen er, dess fleire får problem, påpeika han.
– Alle er samde om at det er urovekkjande. Samstundes, kvar gong me kan gjera noko med det ved å avgrensa tilgangen, vert det likevel stemt for at alkohol skal vera meir tilgjengeleg, sa Moldsvor.
Han meiner dei folkevalde bør leggja den ruspolitiske planen til grunn når dei vurderer skjenkjesaker. Planen, som er politisk vedteken, seier at ein ynskjer ein føreseieleg politikk som ikkje aukar konsumet.
– Me har ingenting mot Skummesalen, men me kan ikkje stemma for at alkohol skal verta endå meir tilgjengeleg i Kvam og gå mot vår eigen plan, sa han.
Halvard Lilletveit (Ap) var automatisk ugild i saka. Han sit i styret for og eig aksjar i Hardanger Bryggeri AS, som er søkjar i saka.
