Klagen kom til Mundheim
To av dei tre planlagde tiltaka til Trond Kvamme og Therese Håland trefte kvist hjå Statsforvaltaren.
Medan annekset ser ut til å passera nålauga, har statens mann i Vestland klaga på dispensasjonen for eit naust og ein garasje. Lokalpolitikarane i Kvam vedtok i november å godkjenna alle dei tre tiltaka på Mundheim.
Hole eiker har vore sentrale i saka, og det er desse som skapar trøbbel for garasjen. Kring eikene i området er det såkalla omsynssoner, og både garasjen og annekset ved bustadhuset vil vera i konflikt med desse, meiner Statsforvaltaren. Garasjen kjem etter hans syn i konflikt med tre hole eiker – «hotspot-habitat» for raudlista artar, skriv han – som er registrerte i Naturdatabasen. Det lokalpolitiske vedtaket stettar heller ikkje krava om utgreiing av fylgjene for naturmangfaldet, meiner Statsforvaltaren.
Grunnlaget for naustklagen er det generelle strandsonevernet, som skal hindra inngrep og sikra mellom anna interessene til ålmenta. Statsforvaltaren meiner det aktuelle området, mellom tømmerkaien og eit byggjefelt i Salbuvik, har gode kvalitetar. Naustet vil privatisera området og råka natur, landskap og friluftsliv, meiner han.
Særleg framhevar han at ein del av naustet vil råka naturtypen «open grunnlendt kalkmark i boreonomoral sone», som er sterkt truga. Det politiske vedtaket inneheld ikkje vurderingane som naturmangfaldlova krev.
Statsforvaltaren meiner at argumenta for naustet og garasjen er av privat karakter. Slike får ikkje avgjerande vekt i dispensasjonssaker etter plan- og bygningslova.
Sjølv om han ikkje klagar på annekset ved bustadhuset, som berre tangerer ei omsynssone kring i eik i tunet, påpeikar han at rotsystemet kan strekkja seg langt sjølv om det ikkje er synleg på overflata. Tiltakshavarane må syta for at røtene ikkje vert skadde under bygginga, formanar han.
Klagen må handsamast av lokalpolitikarane. Om dei ikkje endrar vedtaket om garasjen og naustet, kjem saka til å verta avgjord av ein setjestatsforvaltar.
