Erko Seafood AS har søkt Ullensvang kommune om få auka talet på stålbur frå fire til fem ved oppdrettsanlegget på Kysnes. Det vert ikkje søkt om større produksjon på lokaliteten. Det opplyser kommunalsjef Kristian Bondhus-Jensen til Vestland fylkeskommune.
Oppdrettsselskapet har i tillegg søkt om å få endra anlegget i Gangdal frå stålanlegg til ringar. Heller ikkje her er det søkt om endra produksjon.
Til søknaden på Kysnes er det kome inn ein merknad frå ein nabo som saknar ei støymåling. Støyen har auka kraftig etter at anlegget vart endra og flytta lenger ut for to år sidan, ifylgje merknaden. Det er støy døgnet rundt, spesielt ved fôring, og det er til stor sjenanse for nabolaget.
Både Kysnes- og Gangdal-anlegget vil etter dei eventuelle endringane vera i tråd med arealføremålet i kommuneplanen. Kommunen synest ikkje tiltaka vil gje vesentlege negative konsekvensar. Samstundes syner kommunen til nabomerknaden. Endringa vil bety lite for dei nærliggjande bustadene når det gjeld støy, meiner rådmannen. Kommunen ber likevel Statsforvaltaren vurdera om det bør hentast inn ein støyrapport.
