Klaga på forsøpling i Jondal
Men det viste seg at bileta var tekne i ein annan kommune.
Ein klage skriven på tysk vart i juli send til Klima- og miljødepartementet, som vidaresende klagen til Miljødirektoratet. Emnefeltet til den tyske klagen er merkt «Schädigung der Natur in Garden».
Innsendaren la ved tre bilete av tønner merkte UN-1863, som tilseier at dei inneheldt jetdrivstoff for fly. Desse var merkte med «Fonna». Ingebjørg Svindland, sjefingeniør i seksjon for sirkulær avfallshandtering i Miljødirektoratet, skriv i ein e-post til Ullensvang kommune at ho lurer på om fata kunne høyra til «Fonna skisenter» i Jondal.
Statsforvaltaren i Vestland bad i september kommunen om å fylgja opp saka. Ullensvang kommune opplyser i eit brev 2. oktober at det ikkje er identifisert noka forsøplingssak i kommunen som svarar til skildringa i saka. Kommunen har gått grundig gjennom saka, og skriv at det er indikasjonar på at bileta er tekne på Garen Camping i Eidfjord kommune.
– Me er uroa over at Statsforvaltaren i brevet omtalar Fonna skisenter i klagen, som kan gje eit feilaktig inntrykk av at firmaet er involvert i forsøplingssaka. Det er viktig at me unngår slike misforståingar, då det kan skada omdømet til eit firma utan grunnlag, skriv kommunen.
Ullensvang kommune ber om at det blir sendt eit brev til skisenteret med orsaking i denne saka.
– Me ber Statsforvaltaren om å korrigera dette og retta førespurnaden til rett kommune for vidare oppfølging, heiter det i brevet.
