Kjøpte ikkje tomt til biogass

Biogassprodusenten Renevo AS nytta ikkje sjansen til å kjøpa ei tomt i Tryglavik i Jondal før fristen gjekk ut.

Opsjonen på kjøp av om lag 12 mål, som vart spikra i ein politisk godkjend intensjonsavtale hausten 2022, gjekk ut 1. august. Næringssjef Randi Rykkje opplyser at det var dialog mellom kommunen og selskapet i tida før fristen gjekk ut.

Dialogen vart journalført fyrst då HF etterlyste han sist veke. HF har fått innsyn i han. Her går det fram at Renevo i samtale med Rykkje har gjeve uttrykk for ynske om å lengja intensjonsavtalen. Ho oppmoda selskapet om å senda ein førespurnad om ein ny avtale og gjera greie for mellom anna framdrift. Nokon slik førespurnad er ikkje registrert.

Rykkje bad i slutten av august selskapet om å levera ymse dokumentasjon som manglar for å kunna gjera planframlegget for området ferdig. Tilbakemeldinga frå Renevo var at det kan vera lurt å venta med å regulera området til det er sendt søknad til Statsforvaltaren om utsleppsløyve. Årsaka er at det er ein omfattande og dyr prosess å planleggja eit biogassanlegg, og at det er krevjande å ha alt klart i samband med reguleringa.

Ifylgje Rykkje er det avtala eit møte om planarbeidet og intensjonsavtalen mellom kommunen og Renevo i slutten av månaden.

HRP AS er på vegner av kommunen i ferd med å utarbeida reguleringsplanen med tilhøyrande konsekvensutgreiingar for eit stort industriområde i Tryglavik. Biogasstomta er ein mindre del av området.

I kommunikasjon mellom kommunen og konsulentselskapet i juni kom det fram at sistnemnde meiner at det kan verta utfordrande å få planen godkjend. Årsaka er at nesten alle tema i konsekvensutgreiingane er vurderte «til å ha alvorlig eller svært alvorlig konsekvens for spesielt miljø og natur».

I starten av august møttest HRP og kommunen for å drøfta arbeidet med ei av utgreiingane i planarbeidet, nemleg ein analyse av lokaliseringsalternativa. Ein slik analyse har mellom andre Statsforvaltaren stilt krav om. HRP påpeika i møtet at arbeidet kan resultera i at andre område enn Tryglavik kan enda som det beste alternativet. Av ei skildring av trongen for ein fagrapport om klimagass- og energikalkylar går det fram at det har «vist seg utfordrende å dokumentere de positive effektene av et biogassanlegg opp mot de negative konsekvensene med eksisterende kunnskapsgrunnlag».

Lisa Karine Haugland (R) har teke opp Tryglavik-saka i ein interpellasjon til kommunestyremøtet 18. september. Eit av spørsmåla hennar er status for intensjonsavtalen.

Les også: