Kjøpte buss til barneheim

For å få med heile historia, lyt me tilbake til ein sightseeingtur som vart arrangert for Ukrainaforeningen i Bergen tidlegare i år. Lions Bergen Vest og Lions Laksevåg stod bak arrangementet.

Arne Johan Buanes, som er styreleiar i Kvam Auto AS og Kvam Bil og Eigedom AS, var med frå arrangøren si side. På turen kom han i prat med nokre ukrainarar. Dei fortalde om tre barneheimar aust i landet som hadde vorte øydelagde i krigen. No var ein ny barneheim laga til vest i landet, men det var tøft. Var det noko Buanes og Lions kunne hjelpa til med for å betra situasjonen for dei kring seksti borna som bur der?

Det var det, tenkte Buanes. Og han visste om fleire som kunne hjelpa.

For kring ein månad sidan kontakta han Vikør, og 9. november køyrer ein buss av garde.

– Buanes er bra effektiv. Han heng på, og då lyt me gjera det same, seier Vikør.

– Mohn var med

Ein av dei fyrste Buanes kontakta, var Vikør. Han trong hjelp til å finna ein buss. Vikør kikka på nettet og fann ein Scania med 52 sete som han kunne gå god for.

Korkje økonomiske rammer eller finansiering var på plass. Saman med styret i eigedomsselskapet tilbaud Vikør seg å kjøpa bussen, slik at han ikkje vart seld til andre. Trond Mohn, som er hovudaksjonær, var med med ein gong. Det heile enda med at bussen ikkje vart fakturert. Selskapet gav bussen til innsamlinga.

– Kva kosta han?

– Han kjem vel på eit par hundre tusen, seier Vikør.

– Alle seier ja

No har Kvam Auto hatt ein skikkeleg sørvis på bussen, for at ein skal vera sikker på at det ikkje vert noko tull med han på veg ned. Eller i alle fall så sikker som ein kan verta, fortel Vikør.

– Ein vert jo frustrert over det som skjer, og eg synest det er godt å kunna bidra. Med noko, i alle fall.

Å skaffa delar til bussen har gått over all forventing. Fleire leverandørar har bidrege frivillig utan betaling. Også dekk vart leverte gratis.

– Eg har knapt fått snakka ferdig før leverandørane har sagt ja, seier Vikør.

– Kjennest trygt

Bussen skal fyllast med utstyr og klede som borna treng, og så skal han frakta borna mellom barneheimen og skulen. Barneheimen heiter Zatyshok og ligg i byen Pylypets i det krigsherja landet.

Området skal ikkje vera veldig råka av krigen, men det er vanskeleg med forsyningar, og heimen har også vore ein del utan straum, fortel Vikør. Difor sender han også nedover eit aggregat på 30 kilowatt som kan halda liv i bygget.

Også Arne A. Fonneland, styremedlem i Kvam Bil og Eigedom, bidreg til innsamlinga. Kvemmingen er dagleg leiar ved Janusfabrikken AS på Espeland. Verksemda produserer ullklede og har bestemt seg for å senda ein heil del klede til barneheimen.

– Det er slikt me gjer frå tid til anna. Det viktigaste for oss er at me har kontaktar som gjer at me veit at kleda kjem fram. Der er Lions flink, seier Fonneland.

Samlar inn pengar og utstyr

Prosjektet har vorte stort. Lions Bergen Vest og Lions Laksevåg, som tok initiativet, har fått med seg sju andre klubbar i den humanitære organisasjonen. Også klubbane i Kvam stiller opp.

– Det er veldig kjekt at me får vera med på dette, seier Turid Bang, leiar i Lions Norheimsund.

Det som har imponert henne aller mest, er at bussen også skal brukast av barneheimen.

Saman med Olav Tombre, leiar i Lions Strandebarm, har ho teke tak i innsamlinga lokalt. Tombre fortel at klubbane heiv seg med både fordi dei synest det er eit godt prosjekt, og fordi ei lokal verksemd er ein så stor del av det.

Lions si oppgåve er å prøva å fylla bussen med naudsynt utstyr og varer, fortel han. Klubbane lokalt skal samla inn pengar frå private og verksemder, og samla inn ski- og vinterutstyr. Pengane skal gå til å få bussen nedover, og til å handla inn klede og naudsynte varer til barneheimen.

Bang håpar at folk vil bidra. Om kvar betalar ein hundrelapp, vert det mykje pengar av det, seier ho.

Noko av utstyret vert kjøpt inn lokalt i byen der barneheimen ligg.