Kjøper heis som kan lyfta tusen tonn
Sveinung Vestbø frå Kvam kjøper den største skipsheisen i Europa.
Kvemmingen er dagleg leiar i skipsverftet Bømlo Skipsservice AS på Langevåg. Verksemda satsar no på ein ny båtheis og på å oppgradera og utvida verftet for 130 millionar kroner, opplyser han i ei pressemelding.
Heisen skal kunna lyfta 1.000 tonn. Han vert bygd i Italia.
Den vanlege løftekapasiteten ved verft i Noreg er på 150—300 tonn.
Ein båtheis med høg kapasitet er nøkkelen til vidare vekst for verksemda, opplyser Vestbø. Ho ligg sentralt plassert i skipsleia mellom Bergen og Stavanger.
Den mobile båtheisen skal etter planen vera operativ i juli 2022. Han vil vera 26 meter høg og 24 meter brei.
Vestbø vekependlar frå heimkommunen. Han seier det er veldig spanande å jobba i verftet om dagen, då botnlina er positiv og ein allereie har passert rekordomsetninga frå fjoråret når vel tre månader står att av året.
