Kjølig helg i vente over heile landet

Helga byr på kaldt vêr og snø i nord, kaldt vêr og nedbør i vest og kaldt vêr og tørt i sør. Og i fjellet er det – til inga nytte – metervis med snø.

Det er Nord-Noreg som får det ordentlege vintervêret komande palmehelg. Trass i ein veldig mild vinter i år, er det framleis vinter og snø i våre nordlegaste fylke.

Det blir det inga forandring på i dagane framover heller. Statsmeteorolog Eldbjørg Moxnes ved Meteorologisk institutt kan fortelje at minusgradene og snøbyene i nord held fram inn mot helga.

– Roleg vintervêr

– Fredag blir det både snøbyer og kaldare, noko som held fram laurdag. Frå laurdag roar likevel vinden seg noko, slik at det blir eit ganske roleg vintervêr i nord, seier ho.

Det vil blåse nordvestleg frisk bris fredag, som kan auke til liten kuling laurdag og søndag og dreie til meir vestleg retning. Generelt blir det noko kaldare i dei to nordlegaste fylka. Utover neste veke kan det bli noko mildare.

Sola vil stort sett glimre med fråværet sitt i Nord-Noreg, kanskje blir det gløtt av sol nokre stader, men ikkje mykje.

Vindfullt og snøbyer

Både fredag, laurdag og søndag vil få snøbyer frå Stad og nordover, både i Møre og Romsdal og i Trøndelag.

– Det vil blåse nordvestleg vind opp mot liten kuling kombinert med snøbyer både fredag og laurdag i desse fylka. Søndag ser det ut til å kunne kome litt mildare luft i Midt-Noreg, noko som gir ei høgare snøgrense, seier ho.

I høgareliggjande område på Nordvestlandet vil det truleg framleis kome snø, fredag og laurdag òg heilt ut mot kysten.

Sør for Stad og vidare sørover kjem det òg nordvestleg vind fredag, med snøbyer i periodar òg. Seint fredag kan det kome snø heilt ned mot kysten.

– Bergen kan kanskje kome til å oppleve litt kvitt seint fredag, men så vil temperaturen stige litt utover laurdag og søndag. Det vil gi regn i lågareliggjande strøk, seier Moxnes.

Sørover til og med Rogaland vil det òg vere kjølig, og det vil kome sludd i periodar fredag og laurdag før temperaturen stig att.

Tørken held fram

I Sør-Noreg har det vore veldig tørt lenge, og farenivået for skogbrann er på gult nivå. Gras- og lyngbrannar er i gang i låglandet mange stader i Sør-Noreg, og fleire kommunar har allereie innført bålforbod.

Brannvernforeininga har òg bede folk som skal nyte påska med turar i skog og mark, om å droppe bål og grilling.

Statsmeteorolog Moxnes kan ikkje love at situasjonen blir betre dei næraste dagane og inn i helga.

– Det kjem litt nedbør før helga, men det er såpass lite at det ikkje vil gi utslag, seier ho.

Det er heller ikkje venta noko særleg nedbør austafjells, kanskje noko byevêr nord på Austlandet og kanskje noko sludd og snø i innlandet, men stort sett vil det vere opphaldsvêr.

Nattefrost

Også i Sør-Noreg med Austlandet vil det bli lågare temperaturar og kaldare, med nattefrost i helga.

– Det blir ei kald helg, men temperaturen vil stige på søndagen og kome opp i 10 grader, seier ho.

Det vil òg kome periodar med sol både fredag og laurdag, medan søndagen vil det bli litt meir skya.

(©NPK)