— Kjennest ikkje rettvist

Fleire politikarar er uroa over at regjeringa har bede Folkehelseinstituttet vurdera ytterlegare skeivfordeling av vaksinane, slik at 24 kommunar i område med høgare smittepress kring Oslo får fleire enn resten av landet. Avgjerda er ikkje teken enno.

— Bryt prinsipp

— Kan me gjera noko? Korleis ser smittevernlegen på det å gje frå seg vaksinar til meir folkesette område. Me har ei eldre befolkning her, sa varaordførar Kjellaug Hoås Samland (Ap) då framdrifta vart drøfta i samband med ei orientering i kommunestyremøtet onsdag.

— Regjeringa bryt prinsippet om likt helsetilbod til alle, sa Trygve Bolstad (Ap).

— Det kjennest ikkje rettvist lenger, sa Per Helge Sekse (Sp).

— Skeivfordelinga går mot norske prinsipp og lover om lik rett til helsetenester, sa Amund Velure (Ap).

Fleire framheva at turistsesongen står for døra, og at smitterisikoen dermed vil auka kraftig. Sist helg var det svært mange bubilar i Odda.

— Risikoen vår vert mangedobla, sa Bolstad.

— Kan kallast umoralsk

Brühl sa at ho har gjeve klare tilbakemeldingar til Statsforvaltaren om at ho ikkje synest ei eventuell skeivfordeling vil vera greitt, og at det vil skapa store utfordringar for kommunen.

— Oslo er komen lenger i vaksineringa og snakkar om å vaksinera friske, medan me har att mange med underliggjande sjukdomar. Det er usolidarisk og kan kallast umoralsk, sa ho.

Ho sa at kommunen må ha i bakhovudet at turistane vil strøyma til kommunen dei neste månadene. Bolstad etterlyser meir direkte handling for å vera føre var.

Ordførar Roald Aga Haug (Ap) fekk støtte til å venda seg til Hardangerrådet for å freista samla støtte til eit felles protestskriv til styresmaktene. Etter ein kort pause opplyste han at straumpost var send til både rådet og Statsforvaltaren.

Kalla inn frå ferie?

Brühl opplyste at 3.114 hadde fått fyrste vaksinedose og 980 andre vaksinedose 16. mai. I alt var dermed 4.084 vaksinert heilt eller delvis.

For tida vert personar i aldersgruppa 65—74 år vaksinerte, pluss personar med høg risiko i gruppa 18—64 år.

Grove estimat tilseier at kommunen kan vera i mål med vaksineringa i september om ikkje skeivfordelinga vert forsterka. Estimatet tilseier at kommunen får 21.000 dosar i perioden mai—september.

Om den signaliserte skeivfordelinga, som vil gje Ullensvang 35 prosent færre dosar i inntil sju veker, kan ferdigstillinga verta utsett i om lag to månader til november.

Kommuneoverlegen opplyste at det kan verta naudsynt å kalla tilbake tilsette frå ferie for å få gjennomført vaksinasjon i sommar. Terskelen for å gjera det bør vera høg, meiner ho, for dei tilsette er allereie utfarne etter at dei har hatt mykje ekstraarbeid som følgje av pandemien. Generelt er mangel på personell og vanskar med rekruttering utfordrande.

Om kommunen skulle koma i den situasjonen at han må takka nei til vaksinar, vert dei sende til andre kommunar, ifylgje Brühl.

Får tilbod om anna

Ein liten del av dei som er vaksinerte i Ullensvang, har fått fyrste dose med den mykje omtala Astrazeneca-vaksinen. Mellom andre Andreas Jacobsen (R) spurde kva som skjer med desse.

Brühl opplyste at desse får tilbod om andre dose med Pfizer-vaksine. Sjølv om observasjonstida har vore kort, tilseier all forsking så langt at det skal gå greitt. Ifølgje Therese Kolltveit, leiar for legetenesta, vil ni av ti ta imot den andre dosen. Dei få som vil avventa, har ein førebels ikkje noko alternativt tilbod til.

Samland spurde korleis ein prioriterer internt i dei ulike gruppene som skal vaksinerast. Kolltveit opplyste at alle vert kalla inn etter alder i kvar gruppe. Når nokon ikkje kan, kontaktar ein nestemann på lista.

Brühl forsikrar om at ingen vaksinar vert kasta. Om nokon ikkje møter til vaksinasjon, har kommunen ei liste med «reservar» som kan kontaktast.