Kjempesuksess for Hallvardsnaustet

Restauranten starta med komletorsdagar i fjor vinter. Så opna han for sundagsmiddagar og diverse arrangement. Då sommaren i 2023 kom, small det verkeleg.

– Me visste ikkje kva me gjekk til. Me jobba oss nesten i hel, for det kom så mange kundar, fortel Raknes.

Han såg at restauranten hadde stort potensial. I år er opningstidene utvida, så ein kan koma innom frå onsdag til sundag.

Kjem langvegsfrå

Mange kjem att gong etter gong for å smaka på den gode maten. Nokre reiser heilt frå Bergen for å eta komler i Hallvardsnaustet.

– Det er kjempekjekt at dei tek turen heilt hit, seier Raknes.

Han ynskjer å lokka endå fleire til Strandebarm. Restaurantgjestene vitjar ofte andre verksemder i same slengen. Raknes tykkjer det er positivt at aktørane i kommunen kan hjelpa kvarandre og spela andre betre.

Det er plass til over hundre gjester i naustet. På sjømatbuffé er det ofte heilt fullt.

– Då er det kjempestemning. Sol, sjømat og folk som kosar seg, fortel Raknes.

Raknes ynskjer å servera noko nytt i buffeen kvar gong. Slik får dei faste gjestene litt variasjon.

Overkomeleg pris

Raknes er oppteken av gode smakar, og han prøver å handla ingrediensar lokalt. I tillegg ynskjer han å halda eit fornuftig prisnivå. Ifølgje Raknes skal Hallvardsnaustet vera ein nabolagsrestaurant folk kan besøkja fleire gonger. Då er det ikkje noko poeng i å laga superavansert michelinmat som kostar 1.600 kroner per person.

– Folk skal kunna ta med familien på sundagsmiddag ein gong iblant. Det kler huset, fortel Raknes.

Ifølgje han er det lurt å reservera bord om ein vil sikra seg plass og mat. Det har skjedd at restauranten har gått tom for komler. Reservasjonar gjer det lettare å planleggja både innkjøp og arbeidskraft.

Kreativ matlaging

Nesten alle plantene utanfor naustet er etande. Her finn ein både urter og bær. Kokkane går ut og plukkar, og nyttar vekstane i matlaginga.

– Eg elskar å vera kreativ med slikt. Ein kan omgje seg med smakar og gå på oppdagingsferd mellom plantene, seier Raknes.

Safta frå stikkelsbær kan nyttast i sjømaten i staden for sitron. Rosmarin passar godt i cocktail, og timian kan brukast i dessert. Her er det berre å eksperimentera.

Raknes føretrekkjer kokkelering framfor administrativt arbeid, men som dagleg leiar i Barmen AS vert det mykje av sistnemnde. Han må leggja inn bestillingar, laga rutinar og ha kontroll på lokalet og tilsette. Raknes prøver å hjelpa til der det trengst mest. Han skulle ynskja det vart meir tid til marknadsføring, matlaging og menyutvikling.

– Å skapa er det eg brenn for. Eg trivst godt når eg får vera kreativ og laga noko, fortel han.

Store planar

Barmen har nådd 14 årsverk totalt. Fleire lokale ungdomar har sommarjobb på Hallvardsnaustet. Raknes er oppteken av å skapa eit godt arbeidsmiljø og gje rom for at dei tilsette kan utvikla seg.

– Dette har vore ein draum lenge. Eg har dyktige kollegaer i alle ledd, seier Raknes.

Han tykkjer jobben som dagleg leiar er både utfordrande og kjekk.

Raknes prøver også å sjå moglegheiter og skapa nye tilbod for kundane. Det har allereie vore fleire ulike arrangement i naustet: quiz, konsertar og fotball-VM på tv. Utover hausten står fleire spanande ting på programmet.

– Eg har mange idear. Ein må stå på og gje folk det dei vil ha, fortel Raknes.

Han gler seg mellom anna til å få besøk av Ole Martin Alvsen. Han er ekspertkokk i tv-programmet «4-stjerners middag» og skal bidra på «wine makers dinner» i Hallvardsnaustet.

– Det er stort å få samarbeida med kjende kokkar. Eg gler meg til å laga meny saman med Ole Martin, fortel Raknes.