Kjempar om VM-tittel
Hardanger Bygdeysteri i Øystese stiller med ein ny ost i Oste-VM i Trondheim.
Vel – ny og ny. Osten – ein halvfast, kittmogna «kvitost» – har vore lagra i sju månader, opplyser Marit Buttingsrud på vegner av ysteriet.
Osten vart prøvesmaka i Skummesalen i Mathuset i Hardanger under Siderfestivalen nyleg. Attåt vart sider servert. Tilbakemeldingane var gode, opplyser Buttingsrud, som har ei viss von om ei god plassering i VM og såleis ein pangstart på ostesalet.
Osten som ysteriet er mest kjent for, Steikjeost, kan ikkje delta i VM ettersom det ikkje finst ein høveleg klasse.
I ei pressemelding frå arrangørane vert det opplyst at over fire tusen ostar frå heile verda skal delta i VM, som offisielt heiter World Cheese Awards og i år vert kombinert med ein ostefestival. Initiativtakar er britiske Guild of Fine Food. Dei norske arrangørane er Hanen, Oi! og Norsk Gardsost. Arrangementet går av stabelen i Trondheim Spektrum 26.–28. oktober.
To gonger har Noreg fått ein verdsmeister. Tingvollost vann med blåmuggosten Kraftkar i 2016, og Ostegården vann med Fanaost to år seinare.
