Kjem truleg fram i kveld

Ifølgje kona til Arne Kristian, Kristin Glück-Teigland, byrja dei på den 45 kilometer lange siste etappen torsdag morgon klokka halv seks norsk tid. Då HF snakka med henne klokka 10.30 torsdag, stod 32 kilometer att.

Glück-Teigland hadde sjekka vêrmeldinga. Ho fortel at det på Sørpolen er ein grå dag med minus 27 grader og 10 sekundmeter med vind frå søraust.

– Likevel går det bra. Dei to polfararane er ved godt mot og gler seg sjølvsagt veldig til å koma fram, seier Glück-Teigland.

– Ser etter ein bar

Framme på Sørpolen skal polfararane planta flagget til Fridtjof Nansen på punktet der teltet til Amundsen ligg nokre meter under isen.

– Målet med ekspedisjonen har heile tida vore å ta Nansen til Sørpolen. På basen som ligg like ved polpunktet, er det ein bar. Ryktet vil ha det til at dei har tenkt å finna baren og få seg ein øl. Eg tippar det vankar både mat og drikke, seier Glück-Teigland.

Polfararane slepp å gå attende same vegen som dei kom. Eit fly skal frakta dei til iskanten, der eit nytt fly fraktar dei vidare til Chile. Frå Chile går turen heim. Går alt etter planen, skal dei landa på Flesland fredag 13. januar.

– Høge skuldrer

Kristin Glück-Teigland fortel at turen har vore ei lita påkjenning også for dei som ventar heime.

– Eg kjenner at eg har gått med høge skuldrer i snart to månader, men eg kunne ikkje stå i vegen for den store draumen til AK. Eg måtte berre ta meg saman og fiksa det. No gler eg meg berre veldig til å sjå han att. Eg håpar han ikkje har tenkt å leggja ut på sånne turar altfor ofte, seier ho.

Ho trur turen vert ei skilsetjande oppleving for mannen.

– Eg ser ikkje bort frå at det vert «AK» før og etter polferda. Ei slik oppleving marinerer både sjel og kropp. Eg er veldig spent på kva slags mann eg får heim att, seier ho.

– Ein lyt ta dag for dag