Kjem til å ettersenda detaljert skattesetel

Eigedomsskattelova føreset ikkje at skattytarane får meir enn ein enkel skattesetel som gjev nøkkelopplysingar som takst, frådrag, skattesats og skatt. Denne setelen seier ingenting om korleis eigedomane er vurderte av sakkunnig nemnd på dei ulike punkta i retningslinene.

Vil du vita meir for å ha betre grunnlag for å klaga på skatten, har du vore nøydd til å be Kvam herad om den detaljerte skattesetelen.

Sender ut snart

I ettertid ser heradet at den detaljerte skattesetelen burde ha vore send til alle skattytarane, opplyser økonomikonsulent Tone Ødegaard Skår og Kristi Neteland, økonomi- og personalleiar, på vegner av Kvam herad i ein e-post til HF. Ifylgje dei kjem heradet til å ettersenda denne til alle skattytarane denne veka.

Då fakturaen vart send ut, tok så mange kontakt for å få meir informasjon at heradet fekk vanskar med å svara folk raskt, men tidleg denne veka var administrasjonen a jour. Ein er derimot ikkje i gang med å handsama klagane som er komne.

Heradet fekk mellom anna ein del spørsmål om kvifor summen på fakturaen er høgare enn på skattesetelen, noko som kjem av at fakturaen omfattar også andre kommunale gebyr. Elles har fleire spurt om gards- og bruksnummer som ikkje lenger er slegne saman eller delte, etter at Kvam herad har reinska litt opp i eigedomsregisteret.

Har teke høgd for «tap»

Dei fleste klagane HF har sett gjennom, gjeld takstar klagaren meiner er for høge. Ifylgje Skår og Neteland har heradet teke høgd for at inntekta til Kvam herad kan minka litt etter at klagane er handsama. Ein ventar likevel ikkje så store endringar at nedgangen vert merkbar.

Promillesatsen som heradsstyret har vedteke, er 3,2. Denne kan ikkje endrast før 2022. For bustader og fritidseigedomar er maksimal promillesats 4.

Økonomikontoret opplyser at ikkje berre dei som meiner taksten er for høg, vender seg til heradet. Enkelte lurar på kvifor taksten er lågare i år enn i fjor. HF har enno ikkje funne døme på at nokon har klaga fordi dei meiner taksten er for låg. Om taksten er for låg på grunn av feil, kan det rettast opp til neste år.

Fristen for å klaga på eigedomsskatten er 12. april. Ein kan få utsett fristen dersom ein har grunnlag for det, opplyser Skår og Neteland.