Kjekt å vita om bankinnlogging
BankID på mobil vert gradvis erstatta av BankID-appen. Her er lokalbanksjefens råd i samband med overgangen.
– For dei aller fleste vil BankID på mobil fungera i lang tid, og kodebrikka skal bestå, skriv May Turid Tømmervik, avdelingsbanksjef i Sparebanken Vest i Kvam, i ei pressemelding.
Telefonlina til kundesenteret til banken er raudglødande for tida. Så å seia alle spør om det same: BankID.
Brukar tid
– Me brukar tid med kvar og éin av dei som ringjer og syrgjer for at dei lukkast med aktiveringa av BankID-appen. Me legg ikkje på før me er sikre på at kunden kjem i mål. Det tek litt tid, seier Tømmervik.
Dei aller fleste vil ha tilgang til BankID på mobil ei god stund til.
– Det er fyrst når du byter mobilabonnement eller SIM-kort, mistar mobilen eller gløymer den personlege pinkoden til BankID på mobil at du blir råka av endringa, seier banksjefen.
– BankID med kodebrikke og BankID-passord, som dei fleste kjenner godt til, skal leva vidare i tillegg til den nye BankID-appen, seier Tømmervik.
Nær halvparten av kundane som har BankID frå Sparebanken Vest, har lasta ned BankID-appen. Talet stig.
– Me tilrår at du lastar ned og aktiverer BankID-appen før du byter SIM-kort. Då har du alternativet klart før du mistar tilgangen til BankID på mobil, forklarar banksjefen.
Vanleg med ventetid
Her er dei vanlegaste årsakene til at aktiveringa av BankID-appen stoppar, og tips om kva du kan gjera med det:
1. Du må ha ein aktiv BankID for å kunna bruka BankID-appen. Denne kan ha «gått ut på dato» om du berre har brukt BankID på mobil den seinaste tida. Sjekk bankid.no om BankID-en din er aktiv. Om han ikkje er det, må du aktivera han på nytt i banken.
2. BankID-passordet er det same som du brukar med kodebrikka. Dette passordet treng du når du skal aktivera appen. Om du har gløymt passordet, kan du ta kontakt med kundesenteret for å tinga eit nytt. I mange bankar kan du også tinga nytt passord i mobilbanken eller nettbanken.
3. Når du aktiverer BankID-appen med kodebrikke eller BankID på mobil, må du venta i ein time før du kan ta appen i bruk. Dette får du melding om på telefonen din, og det gjeld alle. Det er altså ikkje telefonen din det er noko gale med.
4. Du kan også aktivera BankID-appen med ein kode som vert send i tekstmelding eller e-post. Dette er eit godt alternativ for deg som nyleg har aktivert BankID eller tinga nytt BankID-passord. Med denne metoden er det inga ventetid i sjølve aktiveringa av appen, men du må venta i sju dagar med å bruka appen.
Har du akkurat tinga ny BankID eller nytt passord, kan det vera lurt å venta i 15 minutt etter at du har fått den nye BankID-en eller det nye passordet, ifylgje banksjefen. Det kan nemleg ta litt tid før alt er synkronisert.
