Karsleg turfølgje

Tysdag la turleiarane Konrad Flem, Odd Træbakken, Dag Storås og Tor Kildahl planar for kva turmål karane skal vitja dei neste månadene. Sjusete, Kjepso, Fagrasete og Krukås er berre nokre av stadene turfølgjet skal innom før august går over i september.– Skal me drista oss til ein fellestur med damene 14. juni? spør Flem.– Ja, når me er komne til juni er me kanskje klare for det, svarar Storås og ler.

Fri frå damene

Karatrakk er eit samarbeid mellom frivillige, Grannehjelpa og Kvam turlag. På etableringsmøtet førre veke deltok også dagleg leiar i Grannehjelpa, Sidsel Haugen, og leiar i Kvam turlag, Kjell Inge Tufte Tyssen.– Det skal vera låg terskel for å bli med på turane. Turane er ikkje berre for eldre, men også for andre som er heime på dagtid, forklarar Tyssen.Flem, Træbakken, Kildahl og Storås skal dela på å vera turleiarar i starten. Om andre ønskjer å bidra, er det berre å melda seg.– Det viktigaste er at turane er så enkle at alle klarar å fullføra utan motvilje. Praten er like viktig som den fysiske biten, seier Flem.Onsdag er turdag for karane. Dermed kan dei mennene som ønskjer gå tur med Fotalaget på tysdagar, gjera det.

Kvinner og menn

– Kvifor går ikkje menn og kvinner tur i lag?– Me må jo ha litt fri frå damene, seier Træbakken.– Når me har opparbeidd oss litt pondus og form, kan me kanskje ta sikte på nokre fellesturar, seier Storås.Haugen fortel at det har vore etterspurnad i Kvam etter eit slikt tilbod. Det tyder ikkje at malen for korleis turgruppene skal organiserast, er opplesen og vedteken for alltid.– Det er høg grad av brukarmedverknad i desse gruppene. No prøver me med ei turgruppe for menn, og så får me heller evaluera tiltaket etter kvart, seier ho.– Mennene er nok litt tregare enn kvinnene med å koma seg ut. Det vert lettare dersom me får høve til å treffa likesinna, trur Træbakken.

Fleire turgrupper

Gjennom prosjektet Aktiv i 100 ønskjer Den norske turistforening (DNT) og Røde kors å skapa eit betre friluftstilbod til eldre og andre som er heime på dagtid. Organisasjonane har fått pengar frå Helsedirektoratet til å etablera fleire turgrupper. Målet er å betra livskvaliteten til målgruppa gjennom auka fysisk aktivitet og felles opplevingar i naturen.Kvam turlag har søkt om tilskot til å etablera ei ny turgruppe. Det er her Karatrakk kjem inn i biletet.– Me er veldig glade for det samarbeidet som har oppstått for å få i gang eit slikt tilbod, seier Tyssen.– Det er når me arbeider saman, me får det til, seier Haugen.Ho presiserer at ein ikkje treng melda seg på turane. Det er berre å møta opp på parkeringsplassen ved Spar-butikken i Norheimsund når ein kjenner trong for å strekkja litt ekstra på beina.– Dei som har meldt seg som turleiarar, har gjort det fordi dei er interesserte i å verta kjende med nye turmål i kommunen, og fordi dei ønskjer å visa fram favorittstadene sine til andre, seier Haugen og legg til:

– Grannehjelpa si rolle er å administrera tiltaket. Det er viktig at turleiarane slepp den biten. I staden kan dei konsentrera seg om å førebu turane.

Camilla Kvammeredaksjon@hf.no