Kåra årets komet og årets kollega
Tilsette i Extra Øystese fekk gjæve prisar.
Då Coop Hordaland arrangerte sitt årlege fagseminar, vart mellom anna prisar til årets leiarkomet og årets kollega i 2023 delte ut. Begge prisane gjekk til tilsette i butikken i Øystese.
André Narum Berg vart årets komet, medan Åsa Stålberg Skaar vart årets kollega, skriv administrerande direktør i Coop Hordaland, Lise Skarpås, i ein e-post. Ifølgje Skarpås er prisane prestisjetunge.
– Kometprisen går til ein butikkleiar eller mellomleiar som har synt særleg sterk utvikling i leiarskap. Kollegaprisen går til ein medarbeidar som har utmerkt seg ved å skapa fine kunderelasjonar, yta god kundesørvis og bidra til å skapa eit godt arbeidsmiljø, skriv ho.
– Berg utmerkte seg ved å jobba målretta saman med dei andre tilsette kvar dag. Eg tykkjer det alltid er kjekt å vitja butikken, fordi dei tilsette verkar samansveisa og positive, skriv Skarpås.
Ho omtalar Skaar som ein omtenksam og varm medarbeidar, som alltid har eit strålande smil til alle.
– Sjølv om dagane kan vera hektiske, stiller ho alltid opp og hjelper til med å løfta stemninga i butikken.
