— Kan verta habilitetsspørsmål
Øystese Utvikling AS ynskte Kvam herad med i ei referansegruppe i masterplanprosjektet, men det takka rådmann Anita Hesthamar nei til.
— Etter det eg kan sjå, vil ei slik deltaking verta ein del av grunnlaget for dykkar innspel til planar i Øystese som me i neste omgang skal handsama. Då vil det kunna stillast spørsmål om habiliteten vår i handsaminga, skriv rådmannen i ei tilbakemelding til dagleg leiar Hans Jørgen Andersen.
Ho understrekar at Kvam herad må kunna handsama innspela frå Øystese Utvikling uavhengig og likestilt med andre innspel.
Andersen seier til HF at han set pris på at heradet opptrer ryddig, og at det var litt korttenkt å senda invitasjonen. Han vonar uansett på eit godt samarbeid med heradet om tettstadutvikling, eit felt han meiner Kvam herad har ei høg stjerne innan.
Andersen sjølv er dagleg leiar i Kvam Næringsråd, som femner om og skal fremja interessene til næringslivet i heile Kvam, i 40 prosent stilling. Han opplyser til HF at engasjementet i Øystese Utvikling er drøfta og avklara med styreleiar Tone Søgaard.
Søgaard har tidlegare opplyst til HF at rådet ikkje har føringar som gjer det uråd for dagleg leiar å ha andre roller og verv. Andersen er i tillegg med i styret i Hardangerbadet AS og Stiftinga Hardanger og Voss Museum.
— Det som er bra for Øystese, er bra for Kvam, og omvendt, seier han.
Øystese Utvikling har vore i dialog med Distriktssenteret om masterplanen. I ein e-post til senteret opplyser Andersen at selskapet var i dialog med Kvam herad etter nyttår om å setja i gang eit Gnist-prosjekt, men at det ikkje var aktuelt for heradet.
Ordførar Torgeir Næss (Ap) stadfestar at han og rådmann Anita Hesthamar deltok i eit digitalt møte om saka, og at initiativet kom for kort tid før søknadsfristen i år.
