— Kan strida mot lov om heilagdagsfred

Det meiner anleggssjef i Det frivillige Skyttervesen (DFS), Per Jarle Kristiansen.

Han meiner at viss det er tillate med treningsskyting sundagar og heilagdagar, som det er i Vangdalsåsen, så kan det vera i strid med lova om heilagdagsfred, dersom lyden kan oppfattast sjenerande i bebygde område.

Viss Kristiansen skulle gje ei tilråding til dei som driv skytebanen, så ville han sagt at sjølv om det vert opna for skyting i helgane i reguleringsplanen, så avstår ein frå det i så stor grad som mogleg.

DFS gav råd då anlegget vart planlagt. Skytetidene DFS tilrådde, vart vedtekne, unnateke det med sundagar og heilagdagar, opplyser Kristiansen.

Ein brei prosess ligg til grunn for skytetidene i Vangdalsåsen, opplyser leiar for samfunn, næring og kultur i Kvam herad, Jon Nedkvitne. Det har ikkje tidlegare kome merknader knytte til lov om heilagdagsfred.

— Uansett vil me ta ein juridisk gjennomgang, for å vera på den sikre sida, skriv Nedkvitne til HF.

Heradet avgjer

Skytetider kan regulerast anten gjennom reguleringsføresegner etter plan- og bygningslova, eller med konsesjon gjeven av Statsforvaltaren. No er det siste myndet overført til kommunane, og dei er konsesjonsstyresmakt for nye banar. Dei gamle banane ligg framleis under myndet til Statsforvaltaren.

Kristiansen opplyser at ein ikkje kan skyta mellom klokka 23 og 07. Elles er det normalt at ein skyt mellom klokka 8—9 og 22—23, avhengig av stadlege tilhøve.

Normal trening kan ikkje utan vidare føregå om sundagar, men terminfesta arrangement som er varsla på førehand, er tillatne i avgrensa omfang.

Inntil 5–7 stemnehelger i året er vanleg, opplyser Kristiansen.

— Ta omsyn til naboane

— Det me tilrår, er at ein avstår frå å skyta fredag og laurdag kveld, av omsyn til omgjevnadene, viss lyden ber til busetnad. Trening til desse tidene vert ikkje sett på som naudsynt, seier Kristiansen.

Nokre lag har sjølvpålagde reglar for å skåna omgjevnadene. Mange avgrensar skytinga på fredag eller skyt berre om føremiddagen på laurdagar. Då skjermar ein omgjevnadene i størst mogleg grad i den tida då ein har behov for uteopphald og rekreasjon i tilknyting til heilagdagar.

Nokre lag har ein skytefri dag i tillegg, avhengig av korleis tilhøvet til omgjevnadene er.

Minimumsgrense

Det går ei smertegrense på tre — fire dagar i veka for store anlegg, forklarar Kristiansen. Viss skytetida vert mindre enn det, svarar ikkje investeringane seg. Ein må finna ein balanse mellom omsynet til omgjevnadene og behovet for bruk.

— Ein bør unngå sundagsskyting og kveldsskyting fredag og laurdag. Ein bør òg ha ein skytefri dag i veka. Det klarar dei fleste å leva med. Så er det stadlege tilhøve der ein kanskje må ta spesielle omsyn, seier Kristiansen.

Det er Det frivillige Skyttervesen som har mest skytebanefagleg kompetanse i Noreg, for det er den einaste institusjonen som har fast tilsette til å handtera slike saker, opplyser Kristiansen.

— Har ganske vide opningstider

Sven Knagenhjelm, juridisk sjef i DFS, seier at lov om heilagdagsfred seier noko om sportsarrangement generelt. Unødig larm er forbode. Det betyr at viss til dømes ein skytebane ligg slik til at befolkninga kan oppleva høglydt skyting, så vil ein i utgangspunktet tenkja at vanleg treningsskyting på ein sundag ikkje er heilt greitt. Derimot er det på det reine at ein kan ha stemne på sundagar.

— Dei har ganske vide opningstider i Vangdalsåsen. I reguleringsplanen er det ikkje sett spesielle avgrensingar, så vidt eg kan hugsa, seier Knagenhjelm.

Når han får høyra skytetidene i Vangdalsåsen, seier han dei absolutt er innanfor regelverket.

Grunneigar i Vangdalsåsen, Heine Aarekol, meiner at det må innførast skytefrie dagar.

— Det må han gjerne meina, men det er det ikkje grunnlag for, seier juristen.

Det vart utført støysoneutrekningar då banen vart planlagd.

— Så vidt eg kan hugsa, skal ikkje støy frå skytebanen vera noko problem etter reglane om støy for busetnad. At det er støy i utmarka, er ikkje noko problem, seier Knagenhjelm.

Svaret frå Hardanger skyttarlag er i samsvar med hans oppfatting.

Under ti timar i veka

Leiar i Hardanger Skyttarlag, Arve Kolltveit, opplyste at laget har uteskyting i Vangdalsåsen tysdag, onsdag og torsdag i sommarhalvåret. Viss det er stemne, kan ein bruka banen både laurdag og sundag. Laget har skyting under ti timar i veka. Vanlegvis er det ikkje skyting på sundagar. Kvam Pistolklubb har fast treningsdag på tysdagar.

Hardanger Sportsskyttarklubb seier at medlemene skyt berre på ettermiddagen tysdagar og torsdagar, og så er det stemne nokre helgar.

Sportsskyttarklubben har nokre gonger skyting for alle, andre gonger for dei som trenar mest. Det er lov å skyta elles i veka òg, men ikkje etter klokka 21, seier Andor Helgheim i klubben.

Knagenhjelm påpeikar at ein må skilja mellom det at politiet og reguleringsføresegnene gjev rom for eit større omfang, og kor mykje ein vel å bruka banen i praksis. Sjølv om opningstidene er frå måndag til laurdag, betyr ikkje det at alle skyt der til kvar tid.

— Det er ein del som klagar på skytinga utan å kjenna dei reglane som gjeld, seier juristen.

Ynskjer tilbakemeldingar

Fleire banar vart lagde ned etter at banen i Vangdalsåsen var bygd. Han er eit godt eksempel på dugnadsånd og eit godt stykke arbeid frå dei som har vore involverte, meiner Knagenhjelm.

Det er ein del jakt i heradet, og då må ein ha ein bane å skyta opp på, seier den juridiske sjefen.

Kvam herad har ikkje så langt fått dokumenterte meldingar om at det føregår skyting utanom dei oppsette tidspunkta. Det skriv Nedkvitne i eit svar til Aarekol.

Om det skulle vera tilfelle at det er skyting utanom oppsette tidspunkt, ynskjer Nedkvitne dokumenterte tilbakemeldingar.