Kan snart ta steg bort frå asfaltjungelen

Framleis er hovudingrediensane i uteområdet ved skulen asfalt og grus. Medan skulen har vorte retteleg lekker innvortes, er det lite anna enn nokre disser og ein ballbinge å gle seg over utandørs.

I fjor vinter vart det vel å merka vedteke å setja av fem millionar kroner til å oppgradera uteområdet. No har Norconsult AS utarbeidd eit skisseprosjekt for Ullensvang kommune, og arbeidet med det er i sluttfasen. Det opplyser prosjektleiar Øyvind Andersen i kommunen til HF.

I planane er det teikna eit eige aktivitetsområde for dei yngste. Det skal ha disse, balanseløype og sandaktivitetar. Ved området mot elva, der dei yngste held til, er det planlagt sitjegruppe under tak, ballbane på grus, akebakke og klatreskråning. Mot eksisterande ballbinge er det planlagt eit aktivitetsområde med klatring, hinderløype, balanseapparat og disser.

I området mellom skulen og idrettshallen skal det vera eit amfi med takoverbygg, ein basketballbane, øyar med vegetasjon og mogelegheiter for å sitja, syner skisseprosjektet.

– Uteområdet vil vera eit nærmiljøanlegg til bruk for heile bygda også utanom skuletid, skriv Andersen til HF.

Rektor og driftspersonell ved Jondal skule har vore involverte i prosessen, i tillegg til andre. Elevar, føresette, tilsette, kommunen, Jondal Bygdalag og Jondal Idrettslag har fått høve til å påverka planane.

Om teikningane skal realiserast som dei er, må meir pengar på bordet, fortel Andersen. I tillegg er vona å få stønad i form av spelepengar, og at frivillige lag i tillegg kan søkja om stønad frå til dømes stiftingar.

Prosjektleiaren seier han skal gå i gang med søknadsprosessen og sidan skildra og lysa ut oppdraget. Om alt går som det skal og det vert løyvt tilstrekkeleg med pengar i 2025-budsjettet, kan arbeidet vera i gang til våren.

– Kvifor har det teke så lang tid?

– Det er stor aktivitet med investeringar i kommunen, og det vart stopp i framdrifta då me hadde kapasitetsutfordringar i prosjektavdelinga. Dette er beklageleg, og me er no glade for at prosjektet i vår fekk prosjektleiar på plass som syrgjer for framdrift, skriv Andersen.