Kan sikra statleg stønad

Ein slik status vil opna for at heradet og Bergen og Omland Friluftsråd (BOF) kan søkja om statlege pengar til tilrettelegging av områda. Områda vert då klausulerte, og det vert tinglyst eit hefte på eigedomen som seier at eigedomen ikkje kan nyttast til anna enn friluftsføremål utan samtykke frå Miljødepartementet. Statusen skal sikra ålmenta tilgang til sjøen.

Det må lagast enkle forvaltingsplanar som viser kostnader med tilretteleggingstiltak. BOF har sagt seg villig til å vera med på arbeidet. Kvam herad, BOF og grendeutvala vil få drifts- og tilsynsansvaret.

I eit saksframlegg føreslår rådmannen at ho får fullmakt til å søkja om statusen. Saka vert drøfta av formannskapet 2. november og avgjord av heradsstyret 8. november.