Kan mista fleire fag
Ein føreslegen plan for utdanningstilbodet i Vestland inneber mindre endringar i tilbodet i Kvam, medan Odda mistar både tømrar-, smed og idrettsfag.
Onsdag vart ein heilskapleg plan for tilbodsstrukturen i Vestland handsama i hovudutval for opplæring og kompetanse. Planen handlar om utdanningstilbodet på dei vidaregåande skulane fram mot 2035.
I planen foreslår fylkesdirektøren å redusera talet på elevplassar i fylket med 600. 110 av desse ligg i Hardanger og Voss.
Smed, tømrar og idrett
Det vert mellom anna føreslege at tilbodet VG2 helsearbeidarfag ved Kvam vidaregåande skule vert auka til ein heil klasse, samstundes som VG2 barne- og ungdomsarbeidar vert stroke. VG2-tilbodet transport og logistikk er vidareført i framlegget, men det er ein føresetnad at tilbodet vert gjennomført i tett samarbeid med verksemder. Årsaka er at den nye skulen i Norheimsund ikkje har eigna areal til praktisk opplæring i faget.
Skulen skal ha eit elevtal på 193. Det er det same som i skuleåret 2024/2025.
For Odda vidaregåande skule vert det føreslege at elevtalet vert redusert frå 265 i 24/25 til 225. For å nå målet, vil direktøren leggja ned VG2 smed og VG2 tømrar, samstundes som idrettsfaget vert fasa ut.
– Send det i retur
Ikkje alle var nøgde med planforslaget. Frp-politikar Stig Abrahamsen føreslo at planen vert send i retur til administrasjonen for ytterlegare utgreiing. Han ønskjer mellom anna at det kjem fram fleire alternativ til ny tilbodsstruktur.
Partiet fekk med seg både R og INP. Jeanette Onarheim Syvertsen (R) gjorde det i tillegg klart at partiet ønskjer at smedfaget i Odda skal overleva.
Forslaget til dei tre partia nådde ikkje opp, og utvalet tilrådde med 11 mot 4 røyster å senda planforslaget på høyring. Framlegget om å føreslå å ta vare på smedlina i Odda fall med 2 mot 13 stemmer.
Fylkesutvalet avgjer 4. april om framlegget skal sendast på høyring.
