Kan halda fram med terrasse
Ein huseigar i spesialområdet for bevaring i Ålvik fekk byggjestopp på ein terrasse. Han er no oppheva, ifylgje eit brev frå Kvam herad.
21. august fekk huseigaren varsel om pålegg frå rådmannen om å stoppa tømrararbeidet på ein del av tomannsbustaden. Det var starta arbeid med ein terrassekonstruksjon og eit uthusbygg på konstruksjonen.
Etter ei synfaring 28. august vurderte rådmannen kor mykje tiltaket innverkar på bygningsmiljøet. Ho konkluderte med at terrassen ikkje treng godkjenning, men det gjeld ikkje for eit eventuelt uthus eller overbygg på terrassekonstruksjonen.
Byggjestoppen vert oppheva, og arbeidet med terrasse kan ferdigstillast. Terrassen er liten og kan enkelt demonterast, skriv rådmannen. Sjølve tomannsbustaden vert ikkje endra av terrassetiltaket.
Terrassetiltaket vil visa lite igjen i det verna bygningsmiljøet. Terrassen vil likevel framstå som eit framandelement i eit historisk viktig bygningsmiljø, meiner rådmannen.
Tomannsbustaden er underlagd vern gjennom reguleringsplanen for «Byen» i Ålvik, skriv rådmannen. Hovudprinsippet er at alle byggjetiltak som fører til endringar av bygningsmiljøet i «Byen», skal godkjennast av fylkeskonservatoren og Vestland fylkeskommune.
Den tidstypiske arkitekturen og det heilskaplege preget i Villabyen er verna av reguleringsplanen og står på «gul liste» som prioritert kulturminne, opplyser rådmannen.
