Kan fiska pukkellaks
Norheimsund og Steinsdalen Grunneigarlag og Jondal Jakt- og Fiskelag har fått løyve til å fiska etter pukkellaks.
Løyva gjeld ut september i Steinsdalselva og i Jondalselvi. Dei er gjevne av Statsforvaltaren i Vestland på visse vilkår, med heimel i lakse- og innlandsfisklova.
Jondal Jakt- og Fiskelag (JJF) har fått melding om observasjonar av pukkellaks i nabovassdraget Opo, lenger inne i fjorden, og har søkt om å få utføra eit kontrollfiske og å bruka stong til å ta ut pukkellaks. Utfisket skal gå føre seg frå den nedste hølen i vassdraget og opp til Haugafossen.
Av fisken som vert teken ut, skal berre pukkellaksen avlivast, skriv Statsforvaltaren til JJF. Fiske med stong kan vera effektivt, men denne metoden må berre brukast der fiskaren har god sikt, og av fiskarar med kunnskap om handtering av fisk.
Statsforvaltaren tilrår at jondalsvassdraget vert sjekka med snorkel før ein set i gang fisket.
Laga skal registrera om fisken som vert fanga, er oppdrettslaks, regnbogeaure, sjøaure, villaks eller pukkellaks. Dei skal i tillegg orientera om fisken er kjønnsmogen, deformert, har mykje lus eller er luseskadd og om han vart sett ut att, teken vare på eller vart avliva.
– Hjå oss er det i hovudsak oddetalsgenerasjonen av pukkellaks som har slått til, og me ventar difor pukkellaks i vassdrag i Vestland i år, skriv Statsforvaltaren.
Pukkellaks er ein framand, uynskt art som potensielt kan påverka stammene av laks og sjøaure og økosystema i vassdrag negativt. Overordna mål i Noreg er å fjerne så mykje pukkellaks som mogleg frå norske elvar, opplyser Statsforvaltaren.
Frå 25. juni til 6. august i år er det teke ut over 200.000 pukkellaksar i norske vassdrag.
Jondalselvi har ein laksebestand med «svært dårleg» tilstand, vurdert i perioden 2015–2019, og ein sjøaurebestand med «moderat» tilstand, vurdert i 2021. Det opplyser Statsforvaltaren, som viser til lakseregisteret.
Steinsdalsvassdraget er elles stengt for fiske, opplyser forvaltaren. Laksestamma er særs dårleg etter kvalitetsnorma og har særs dårleg gytebestandsoppnåing og haustbart overskot. Stamma av sjøaure har dårleg tilstand. Det vert samla inn fisk frå vassdraget til levande og frosen genbank.
