Kan få tala til heradsstyret: – Ei viktig utvikling av lokaldemokratiet

Ungdomsrådet i Kvam bad tidlegare i vår om å få møte- og talerett i Kvam heradsstyre og formannskap.

Ordførar Torgeir Næss (Ap) meiner tida er mogen for å legga til rette for at ungdomsrådet skal få sleppa til på den politiske arenaen i større grad, og vil komma rådet i møte.

Han tilrår at inntil to medlemer får tala i saker som gjeld born og unge. Rådet får halda eit førebudd innlegg på inntil fem minutt i starten av sakshandsaminga, men får ikkje delta i sjølve debatten. Ungdomsrådet må avtala frammøte med ordføraren i forkant.

– Ordføraren har merka seg det store og viktige politiske engasjementet ungdomsrådet har vist i fleire saker. Å sleppa ungdommane til er ei viktig utvikling av lokaldemokratiet, heiter det i utgreiinga av saka.

Ho vert lagd fram for formannskapet 10. juni og heradsstyret 16. juni.