Kan få draghjelp til leirskule
Hardangerakademiet har på nytt planar om å skipa til leirskular. Rådmannen vil yta 190.000 kroner frå næringsfondet til ein forretningsplan.
Kostnadsplanen for hausten 2022 er på 386.500 kroner. Hardangerakademiet har søkt om 231.500 kroner frå fondet, etter at søkjaren fekk utsett fristen og sende ein revidert søknad. I den opphavlege søknaden bad akademiet om 621.000 kroner i kommunal stønad.
Leirskulane skal haldast for kommunale skular vår og haust. Akademiet har tett samarbeid med Ullensvang kommune gjennom ein leirskuleavtale, og det er inngått avtale med Norges Leirskoleforening, ifylgje søknaden.
Søkjaren ynskjer å skapa eit regionalt og etter kvart nasjonalt senter for utvikling av forståing av sameksistens og miljø mellom unge. I samarbeid med lokale aktørar vil ein tilby overnatting og mat, opplevingar og aktivitetar baserte på eit berekraftig grunnlag, og meistringsaktivitetar for dei som ynskjer det.
Søkjaren skal bidra i det pedagogiske opplegget med dei sentrale verdiane for akademiet innan fred, utvikling og miljø. FN-sambandet i Bergen deltek i undervisinga. Prosjektleiar ved Hardangerakademiet er Ida Sørheim.
I dei kaldaste månadene vurderer akademiet å halda stengt på grunn av høge straumprisar.
Vil løyva pengar
Rådmannen tilrår altså å løyva 190.000 kroner til forretningsutvikling når utval for samfunn, plan og næring drøftar saka onsdag 23. november.
Utvikling av ein forretningsplan med mål om å oppretta eit driftsselskap vil kunna bidra til å sikra framdrift og kontinuitet, meiner han.
Han understrekar at Ullensvang ikkje har andre tilbod om leirskule, og meiner aktiviteten vil byggja opp under målet om levande bygder og sterke sentrum i utvikling, byggja omdøme og vera eit supplement til Jondal som nasjonalparklandsby.
– Søk seinare!
Rådmannen tilrår derimot ikkje å løyva pengar til prosjektet til Hardanger Fjord AS på Hammaren. Grunngjevinga er at arealet som skal nyttast til satsinga på turisme, ikkje er avklara i kommuneplanen enno. Politikarane har vedteke å konsekvensutgreia området. Søkjaren vert oppmoda om å søkja seinare.
– Konseptet er ulikt majoriteten av tilbod i Ullensvang kommune, og er såleis eit spanande supplement til reiselivet i kommunen. Det er vurdert som særleg positivt at tiltaket har fokus på potensial for samarbeid mellom aktørar langs fjorden, og mogelegheitene som ligg i dette, skriv rådmannen.
