– Kan eventuelt trekkja saka i lagmannsretten
Tørvikbygd Båtlag har søkt Kvam herad om 500.000 kroner til å utvikla hamne- og friluftsområdet i Skutevik.
Laget ynskjer betre løysingar som gjer at fleire kan få ein god plass å ha båten. Ein ynskjer best mogeleg å stetta behova til grunneigarar og ålmenta, ifylgje søknaden.
Båthamna i Skutevik vart etablert i 2020. Nokre av naboane i Skutevik saksøkte båtlaget fordi dei meiner båtlaget har teke seg til rette utan å ha hand om naudsynte rettar. Tingrettsdomen pålegg båtlaget å fjerna og flytta delar av anlegget. Båtlaget har anka domen til lagmannsretten.
– No ynskjer me å få til endringar som gjer at fleire brukarar av området kan få betre vilkår for å få fortøya og manøvrera i eit område som er avsett til friluftsområde i sjø og småbåthamn. Om det vert løyvt pengar som kan bidra til utvikling i staden for konflikt, så kan ein eventuelt trekkja saka i lagmannsretten og verta einig om gode løysingar i hamneområdet, skriv båtlaget.
I kommuneplanen er det lagt opp til at alle bygder bør ha felles båthamner i staden for at båtar er spreidde i alle viker, påpeikar prosjektleiar Johannes Øverland.
Bølgjedemparen vert nytta av bygdefolk og reisande til rekreasjon og sosial møteplass. Større båtar nyttar bølgjedemparen til av- og påstiging, og han er særs viktig for trafikkavviklinga over fjorden når ferja har driftsstans, skriv Øverland.
Båtlaget reknar med å bruka 20.000 kroner i dugnadstimar i både 2022 og 2023. Det er kalkulert med 400.000 kroner til flytebryggjer, 100.000 kroner i forankring og utlegging og 50.000 kroner i prosjektering og planlegging. Samla kostnad er 615.000 kroner over to år.
