Kan betra nettilgangen i Ullensvang
Ullensvang kommune bør løyva inntil éin million kroner til breibandprosjekt som får tilskot frå ei fylkeskommunal ordning.
Det meiner rådmannen, som føreslår finansiering frå konsesjonsavgiftsfondet.
Ordninga skal vera med og byggja opp denne typen infrastruktur i område der det ikkje er kommersielt lønsamt å byggja ut. Den fylkeskommunale potten er i år på 33,5 millionar kroner.
Frå i år gjeld ordninga for husstandar og verksemder som i dag har tilgang til nett med ein kapasitet på under 100 megabit per sekund. Tidlegare har denne grensa vore på under 30 megabit. Dette gjer at ordninga no opnar for stønad til fleire område enn før.
Mykje av pengane kjem frå ei rammeløyving frå Kommunal- og moderniseringsdepartementet. Vestland fylkeskommune vil ta kontakt med alle kommunane for å gå gjennom bygg som kan få stønad. Søknadsfristen er 28. april.
Saka skal drøftast i formannskapet 17. mars og vert avgjord av kommunestyret 29. mars.
