— Kampen om inkludering og likestilling skal fortsetja
Små og store samla seg i Øystese for ei felles markering for mangfald.
Det var reine 17. mai-stemninga i Øystese då born og vaksne samla seg ved Kabuso laurdag. Men denne gongen var det flagg i regnbogen sine fargar som dominerte.
I løpet av veka har ulike arrangement i regi av Fargerikt Kvam vorte stelte i stand i Norheimsund og Øystese. Laurdag var det talar, parade og konsertar som stod på programmet.
To av dei som deltok i paraden, var Urte Jouzaponyte og Adele Froestad Gjerde. Dei er samde om at det er positivt å ha ei slik markering i Kvam.
– Det er på ein måte som 17. mai, berre litt kjekkare, seier Jouzaponyte.
Både ordførar Torgeir Næss og Beate Gauden heldt talar før toget gjekk.
– Skeive skal vera synlege, skeive skal ytra seg og visa at samfunnet er mangfaldig. Så kampen om inkludering og likestilling skal fortsetja. Difor feirar me pride, sa Næss.
Gauden tala om korleis ho ser føre seg at Kvam skal vera i framtida.
– I 2030 vert ingen av oss mobba for å vera den ein er. Du blir ikkje mobba for å vera annleis — me er alle annleis, sa ho.
Ho vonar at ein i framtida ikkje treng pride-flagg for å kjempa for aksept for mangfald, men at endringar i haldningar vil føra til at folk ikkje er dømande, usikre eller redde.
– Då er me nysgjerrige, kreative og me spør kvarandre i staden for å slå fast noko, sa Gauden.
Sjå bilete frå paraden:
