Kalkunar på flukt på Aksnes
Eit uvanleg syn møtte bilistar som passerte Aksnes måndag morgon.
Geir Sigurd Handegård, avdelingsleiar for teknikk ved NAV Hjelpemiddelsentral Vestland Bergen, var på veg til jobben då han fekk auga på noko han ikkje har sett før.
— Det første eg såg, var eit par andre bilar som hadde stoppa. Då eg kom nærmare såg eg ein haug med kalkunar i begge køyrefelta. Hadde ein komme i full fart inn i den flokken, kunne ein fort ha meia dei ned, seier han.
Dagleg leiar i Økodrift Homlagarden AS, Brynjolf Sæhle Pedersen, fortel at fuglane tilhøyrer verksemda.
— Om lag fem hundre kalkunar har vore på flukt, men alle dyra er komne uskadde heim att, fortel han.
Årsaka til flukta er at kalkunane fann ei opning i gjerdet som stengde huset dei vart haldne i.
— Me brukar bambusstenger med lappar i endane til å gjeta fuglane. Det gjekk veldig greitt å få alle attende i huset, seier Pedersen.
Pedersen fekk melding om rømlingane om lag klokka halv seks måndag morgon. Det tok halvannan time å jaga kalkunane attende der dei høyrer heime.
Kalkunar har stukke av frå fjørfeprodusenten tidlegare.
— Men det skjer sjeldan og det har ikkje skjedd i eit slikt omfang før, seier Pedersen.
Han lovar at verksemda har gjennomført tiltak for å hindra nye fuglar flyktar.
