Kald dukkert for ordføraren
Verksemdene i Kvam var ikkje gjevmilde nok til å redda ordførar Torgeir Næss frå eit kaldt bad.
Responsen var ikkje enorm då Rossvollrussen utfordra lokale verksemder til å gje pengar til «Kreftforeningens innsamlingsaksjon». Russen lova at om verksemdene samla inn mest, skulle russestyret å hoppa i sjøen. Om russen vann, lova ordførar Torgeir Næss gjera det same.
Ifølgje innsamlingsleiar Sara Fykse kontakta russen 95 lokale verksemder. Berre to verksemder svara. Dei gav til saman 6.500 kroner.
Dei 39 elevane frå Kvam vidaregåande skule samla inn 59.375 kroner. Dermed vart det med solid margin eit bad på ordføraren. Det fann stad ved stranda i Norheimsund fredag.
– Det var kaldt og eg mista pusten. Eg fekk han heldigvis fort att, sa ordføraren etter badet.
– Kvifor gjekk du med på dette?
– Eg vart spurd, og difor takka eg ja. Det var lenge til det skulle skje då dei spurde.
