– Juli har ikkje vorte som me hadde håpa

Tanja Borge er hotelldirektør ved Hardangerfjord Hotel.

– I fjor var juli veldig bra, og eg håpa og trudde at månaden skulle verta minst like god i år. Slik har det dessverre ikkje vorte, seier ho.

Talet på norske turistar har gått ned, og sjølv om det kjem fleire utlendingar, manglar dei store busslastene med turistar. Særleg saknar Borge kinesarane.

– Me har hatt litt bussar frå Europa, men ingenting frå Asia. Dei siste ti åra har til dømes kinesarane vorte viktigare og viktigare. I år er det ingenting frå Kina, seier ho.

– Flyktar ut av landet

Borge trur kaldt vêr, pluss norske turistar som dreg til utlandet, er mellom forklaringane.

– Dessutan trur eg økonomi kan spela inn. I tider med høge energiprisar og inflasjon vel mange kanskje å bruka pengane på andre ting enn hotellovernatting, seier ho.

Sjølv om Borge er skuffa over juli, er ho nøgd med juni.

– Juni vart ein god månad, takk vere møte og konferansar. August og september ser òg lovande ut. Me har mange bestillingar. Likevel har prisen på mellom anna straum og råvarer stige, og i vår bransje driv me med små marginar. Ein god julimånad hadde gjort at me kunne pusta litt ut, seier ho.

Skuffande i Norheimsund

Arnstein Birkeland, som er hotelldirektør for Thon Hotel Sandven, har ei liknande historie å fortelja.

– Juli var betre i fjor. Eg hadde forventa at det skulle koma fleire norske turistar enn det har gjort, seier han.

Til liks med Borge trur Birkeland at vêret og utlandet har skulda.

– Sjølv om streikane i flybransjen kan ha gjort at nokre har valt å vera heime, verker det som om nordmenn flest vil til utlandet i år, seier han.

Også Birkeland er nøgd med mai og juni.

– Kombinasjonen av at turistsesongen hadde byrja, samstundes som me hadde ein del møte og konferansar gjorde at mai og juni vart veldig bra, seier Birkeland, som har tru på ei lys framtid.

– Det ser veldig bra ut. Me har fleire bestillingar i august i år enn me hadde i fjor på denne tida. Eg er alltid optimist og eg trur me får ein veldig god seinsommar og haust, seier han.

– Betre enn i fjor

Oda Amalie Løberg Grimstad er hotelldirektør ved Hardanger House i Jondal. Ho er nøgd med sommaren.

– 2021 var eit trått år for Hardanger House. I år har sesongen vore god. Me kan sjå at pandemien er på hell. Det ser ut til at nordmenn held fram med å feriera i eige land, samstundes som utlendingane er attende. I juni og juli har me vore meir eller mindre fullbooka, seier ho.

Hotelldirektør ved Jondal Hotel og Gjestgjevarstad, Tiril Njøten, fortel at for hennar verksemd har juni vore den beste månaden i år.

– I juni hadde me fleire gjester enn i juli. I fjor vart det motsett. For oss er sommarskisenteret på Folgefonna veldig viktig. Julivêret har ikkje vore all verda, og då kjem det heller ikkje så mange turistar, seier ho.

Njøten seier førehandstingingane kan tyda på at august vert ein god månad.

– Eg er optimist med tanke på august. Om skisenteret held ope så lenge, trur eg at også september kan verta bra, seier ho.