Jul i både stall og sinn
Hardanger Hestalag inviterte små og store til jul i stallen og på tunet på Stuve Gard laurdag ettermiddag.
Rundt 30 personar fann vegen til gardstunet.
– Det vert ikkje meir julestemning enn dette her, sa ei av dei besøkjande då lokket vart løfta av gløggen i «kafeen».
Skumring, bålpanne, hestar, julelys og graut. Det skulle mykje til for ikkje å koma i stemning. Stallen var pynta med nissar og lys, og nokre av hestane var kledde i tilpassa «nissedrakter». Endåtil hønsehuset var påspandert julepynt.
Dei som ynskte det, kunne laga litt alternativ julepynt – nemleg måla på hesteskor. Elles kunne dei som ville, stella hestar og prøva å ri. Fjordingen Gjertrud vart sala på og gjekk rundar på ridebana, som òg var julepynta.
Det er langt frå fyrste gong Guro Stuve inviterer folk til gards, men ho har aldri gjort det med juletema før, fortel ho, og påpeikar at det er Hardanger Hestalag som er arrangør.
Hestelaget har medlemer frå Eidfjord til Øystese, og samlast om små og større arrangement og idear, ifylgje Stuve. Tidlegare har det vorte arrangert alt frå hesteturar på Hardangervidda til halloweenhopp.
Sjå fleire bilete frå tilskipinga her:
