Journalistane i 4. klasse
FONNA er namnet på skuleavisa til 4.-klassingane i Jondal. Det meste av innhaldet er kreativ dikting.
– Eg likar å skriva «fun facts» frå utlandet. Eg lærte at det er fiber i bæsjen og at ein kan laga papir av han.
Ein av dei unge journalistane har fordjupa seg i elefantbæsjens fleire framifrå sider. Elles finn ein mellom anna vitsar, ei krimhistorie, fakta om Thailand, portrett, oppskrifter på søte kaker og eit assortert utval lysingar om alt frå nyfødde til dødsfall. Inspirasjonen har elevane henta ved å studera innhald, typografi og grafikk i både papiraviser og digitale aviser. Så fordelte dei «redaksjonen» på dei ulike emna.
– Kven er portrettintervjua?
– Eg intervjua han, seier ein elev og peikar fnisande på sidemannen.
Namnet på avisa, som vert på åtte–ti sider, kom til etter ein demokratisk prosess der fleire framlegg vart vurderte. Arbeidet tok til etter påske og skal vera sluttført i veke 21. Bakgrunnen for arbeidet er at elevane har lært om nettvit, eit tema det passa godt å kombinera med avisproduksjon, fortel kontaktlærar Britt Tone Gausvik.
Noko stort opplag vert ikkje publikasjonen trykt opp i. Kvar elev får ei avis med seg heim. Enkelt og greitt.
Då HF var på besøk i klassen 10. mai, fekk elevane høve til å stilla spørsmål til gjestene om jobben. Mellom anna munna det ut i strenge formaningar om å bruka ordboka ofte. Resultatet vart ivrige søk dagen etter, fortel Gausvik, som rapporterer om svært engasjerte 4.-klassingar. Fleire av dei seier til HF at det er kjekt å vera kreativ og dikta opp ting.
Formaningar om å sjekka fakta fall såleis på steingrunn. Det meste i avisa er nemleg tull og tøys.
– Me måtte overdriva så mykje at alle som les, skjønar at det er tull, seier Gausvik.
