Jolegateopning med sut for andre
Jolenissen er kjend for å gje gåver til borna, men på Fykse var det omvendt då små og store samlast til jolegateopning.
– Det er kjekt at borna vil gje gåver til nissen, som han kan gje vidare til dei som ikkje får så mykje, seier Hildegunn Lid.
Ho var med i komiteen då grendelaget på Fykse arrangerte jolegateopning i helga.
Omvendt jolenisse
Sidan 2008 har borna i bygda gjeve gåver til nissen som har dukka opp på opninga, forklarar Lid. Nokre gjev gåver som dei har kjøpt, medan mange gjev noko dei har heime, som dei ikkje brukar meir. Det viktigaste er at det skal vera ei gåve dei trur eit anna barn vil kunna gle seg over.
Gåvene er merkte med alder og kjønn, slik at det vert lettare for nissen å vita kven han skal gje dei til. I tillegg skriv fleire av borna ei lita helsing som dei legg ved gåvene.
Tidlegare er det nissefar som har teke turen innom markeringa. I år dukka også nissemor opp. Paret kom køyrande med hest og kjerre etter at julegrana var tend. Det vart samla inn gåver og delt ut mjølkesjokolade før dei køyrde vidare, fortel Lid.
HF har vore i kontakt med ein av dei to nissane, som ynskjer å vera anonyme. Han skrytte av borna på Fykse.
– Dei stod så fint på to rekkjer med glitrande auge og venta på å levera frå seg gåvene. Dei var så rolege, nesten litt audmjuke, seier han.
– Vil ha ei levande grend
Etter seansen ute samlast dei frammøtte i gymsalen til skulen. Der var det kafé, og arbeidsstova stilte ut det som har vorte laga i haust.
Så fullt var det i salen at det ikkje var ein einaste ledig sitjeplass, ifylgje Lid. Det tykkjer ho er flott.
– Det er utruleg fint å samlast og gjera noko saman. Det er viktig for samhaldet. Me ynskjer jo å ha ei levande grend, seier Lid.
I år har komiteen vore i kontakt med Hallgeir Berge, som arbeider som koordinator for asylsøkjarar i Bergen. Dei har avtala at Berge skal levera vidare gåvene til born som kan ha stor glede av dei.
