Jenta på «Flåklypa»

Irmelin bur på Bjørke med mamma Charlotte, pappa Øystein og broren Benjamin (7).

Frå huset, som ligg 280 meter over havet, ser ho store delar av Hardangerfjorden. Ho og Benjamin har god plass til å leika og sykla. Til dømes leikar dei gøymsel og tikken, og så har familien hatt turbingo. Irmelin er glad i å teikna og måla på rommet sitt, og så innrømmer ho at ho kanskje burde ha teke seg ein pause frå telefonen.

Ungane er mykje ute. Av og til går dei tur til ei hytte dei kallar «sjokoladehytta» på toppen av ein stor stein. Der ligg det alltid sjokolade i ein boks.

– Har du vener på Bjørke?

– Tre nabojenter som er mindre enn meg. Og om sommaren kjem det nokre gonger to som er på ferie her.

Irmelin synest det er litt langt å reisa til dei andre i klassen. Dei fleste bur i Øystese. Av og til vert ho med dei heim frå skulen. Ofte kjem nokre av syskenborna hennar på overnattingsbesøk.

Irmelin og Benjamin tek taxi til og frå skulen. Når dei går på SFO, sit dei på med mamma heim. Irmelin er litt lei av den smale, svingete vegen opp til Bjørke. Han er nesten tre kilometer lang og liknar faktisk litt på vegen til Flåklypa.

Irmelin gjekk på fotball før, men har slutta. Til hausten skal ho kanskje begynna på noko som heiter animasjon og laga film i Kvam kulturskule. Ho kjedar seg ikkje ofte, men trur ho kanskje hadde vore med på meir om ho hadde budd nærare sentrum.

– Då hadde det ikkje vore så langt heim, seier ho.

Irmelin har bursdag på 17. mai! Då kan ho ikkje ha barnebursdag heime, men ho kan vera med på leikane på skuleplassen på Fykse. I ei lita bygd kjenner mange kvarandre. I år song til og med alle som var der, Happy Birthday for henne.