Jaktar på smart visjon

Kva skal vera visjonen for den nye kommunen?

Kan nokre få ord samla innbyggarar, politikarar og kommunalt tilsette kring eit felles mål, ein visjon, ei kjensle av samhøyr, ein strategi, og samstundes marknadsføra kommunen til omverda?

Det var utfordringa til dei som møtte opp til visjonsverkstadane for nye Ullensvang kommune. Etter åtte samlingar i Odda og Ullensvang vart det siste møtet halde i Jondal torsdag.

Her møtte både politisk aktive og meinige menn og kvinner til idémyldring. Kanskje vart den nye visjonen, som skal innlemmast i det strategiske arbeidet til kommunen, påtenkt i Jondal torsdag kveld.

Grøn, kulturell og mangfaldig

Kommuneplanleggar Harald Grande jr. leia verkstadane. Han hadde tre oppgåver til dei frammøtte: identifisera verdiar kommunane har i dag, drøfta utfordringar, moglegheiter og mål, og til slutt å kanalisera dette inn i forslag til slagord.

– Det skal vera noko å strekka seg etter, eit mentalt bilete på framtida, ei meining i det me driv med, noko som inspirerer til å yta betre og fortel kvifor me held på med det me gjer, noko som kan visa veg, inspirera og vera kulturberande, sa han.

Kvar gruppe la til slutt fram eitt forslag kvar. Her er dei ulike forslaga:

Ullensvang ...

– Med hjarte på rette staden.

– Har mange sider – tek du turen?

– Sprudlande, grøn framtid.

– Grøn utvikling frå fjord til fjell.

– Me gjer kulturen vår levande med aktivitetar for mangfaldet. Ullensvang har mykje på gang!

– Me vil utvikla naturkommunen Ullensvang – vil du vera med?

Forslaga frå alle møta skal silast ned til vel eit dusin, av ei gruppe med politikarar og tilsette i administrasjonen. Favorittane skal leggast ut på nett til avrøysting. Dei tre til fem som får flest røyster, skal leggast fram for fellesnemnda, som skal velja eitt.

Naturverdiar og næringsmål

Natur, turisme, Trolltunga, omdøme, sider, akvakultur, tradisjon, dugnadsånd, kraftproduksjon og historie er nokre av verdiane som vart trekte fram av dei ulike gruppene i møtet.

Eit mål for den nye kommunen bør vera å styrka Odda som sentrum gjennom utvikling av bygdene i heile kommunen, sa ei gruppe. Ei anna la vekt på sider, kulturen og tradisjonen for siderbrygging og korleis drikken har vorte «løfta opp frå kjellaren».

Nedgang i folketal og problem med tilflytting skremte ei anna gruppe. Ein må skapa nye næringar i kombinasjon med å styrka gamle, tradisjonelle yrke. Positivt innhald og eit variert og sterkt næringsliv er viktig for å skapa bulyst, vart det sagt.

Andre peikte på arbeidsplassar, spesielt kompetansearbeidsplassar. Mange kommunar har flott natur. Ein treng noko meir, vart det sagt. Turisme og reiseliv er vel og bra, men det må òg vera ein god plass å bu.

Når tre vert éin, oppstår nye moglegheiter. Ein må sjå heilskapen og utnytta dei ulike kvalitetane. Kva tener fellesskapet?

Samstundes må ein vareta lokalsamfunna, og betra infrastrukturen, så avstandane ikkje vert så lange, sa ei gruppe.

Ullensvang kommune kan ta ei leiarrolle i grøn omstilling, sa jondalsordførar Jon Larsgard (Sp). Det kan ein gjera gjennom fornybar energi og berekraftig næringsliv, reiseliv og industri, meiner han.

«Den gode kommunen»

Som inspirasjon til det vidare arbeidet har HF tråla nettet og funne nokre slagord-favorittar frå Kommune-Noreg. Dei vert presenterte utan vidare kommentarar:

• Alvdal – Der det vanskelege er en bagatell og det umulige en utfordring

• Berlevåg – Heftig og begeistret

• Bykle – Bykle ser langt

• Fauske – Folkehelsekommunen der alle trives

• Fredrikstad – Det årner sæ

• Froland – 2+2=5, minst!

• Halsa – Kjenn kor du trivest

• Holtålen – Mulighetenes kommune

• Høylandet – Fly så høyt du vil – med begge beina på jorda

• Klebu – Hei Klæbygg, ka kainn æ gjør for dæ

• Lom – Kom til Lom

• Sande i Møre og Romsdal – Utanfor allfarveg – heldigvis

• Siljan – Den gode bostedskommunen

• Skodje – Den gode bukommunen med mangfald, utfordringar og trivsel

• Sørum – Den gode kommunen

• Vardø – Cedant tenebræ Soli (latin: «Mørket må vike for solen»)

Kjelde: Wikipedia