Jaktar på rovvilt i Øystese

Håvard Fiksen er varamedlem i styret til laget. Han fortel at predatorar et både egg og kyllingar til rype og skogsfugl. Rev og mår er dei verste eggtjuvane, opplyser Fiksen.

Fanga rovvilt gjev poeng i tevlinga, i stigande orden frå eitt til ti poeng: kråke, nøtteskrike, ramn, røyskatt, mink, mår og rev.

Låg terskel

Tevlinga er eit lågterskeltilbod til alle som er interesserte i jakt også på denne tida av året, skriv laget på heimesida. Ein vil ha fokus på viltstell med uttak av predatorar for å prøva å betra bestanden av skogsfugl og rype.

— Kor mykje rev er det i Kvam?

– Det har eg ikkje tal på, men det er ganske mykje. Viss ein er ute om vinteren, så ser ein mykje revespor, seier Fiksen.

Det er lite skogsfugl i Kvam. Rypebestanden varierer frå år til år, fortel han.

— Er nokre dyr meir verde enn andre?

— Som jeger er ein mest interessert i dei artane som kan brukast på middagstallerkenen, seier Fiksen.

Det har i skrivande stund ikkje kome inn meldingar om skote vilt, men laget håpar på litt innsats. Laget låner ut mår- og minkfeller til dei som vil prøva seg på jakta. Tevlinga gjeld både medlemer og ikkje-medlemer i laget. Ein treng jaktkort for å delta. Dei som deltek, kan vinna premiar.

Dersom ein nyttar andre terreng i Kvam enn det som høyrer til Øystese aust, lyt ein ordna avtale med grunneigar.

Natur og mat

Fiksen seier at det er naturopplevingane som står i høgsetet og gjer at det er kjekt å driva med jakt. Og så er det bra mat ein hentar ut, påpeikar han.

Kven som helst kan jakta, så lenge ein har avlagt jegerprøva. Prøven må ein ha om ein så berre skal skyta ei kråke.

Det vanlegaste våpenet til å skyta fugl er hagle. For rev nyttar ein gjerne rifle, men ein kan òg skyta rev med hagle.

– Og så må du vera lurare enn reven?

– Ja, det er ein føresetnad for å få teke han, seier Fiksen.

– Regulerer ikkje naturen seg sjølv, utan at det vert skote dyr?

– Det er det mange meiningar om. Men spesielt mår og rev gjer store innhogg i rypebestandane. Så det kan svinga på grunn av det.

– Gler du deg til å gå i gang med jakta?

– Det gjer eg alltid.