Mats Byrkjeland tykkjer det er ekstra godt å koma tilbake til fjella i Kvam etter å ha vore lenge på Austlandet. Torefjell er favoritten. – Eg må alltid ha meg ein tur der så fort eg kjem heim, fortel han.

Jaktar på fjelltoppar

Seks år har gått sidan Mats Byrkjeland laga appen «Postkassetrimmen». I dag har appen om lag 18.000 registrerte brukarar.

Publisert Sist oppdatert

I appen kan ein samla på ulike fjelltoppar. Ideen kom etter at spelet «Pokémon GO» tok landet med storm. Byrkjeland tenkte at det burde ha funnest ein liknande app der ein kunne jakta på fjell i staden for animasjonsfigurar. Etter å ha fullført ein mastergrad i datateknikk på NTNU i 2017, tok han saka i eigne hender. Med ein lang sommarferie framfor seg hadde kvemmingen endeleg tid til å setja planen ut i livet.

– Ideen utvikla seg fort medan eg gjekk rundt i fjella og tenkte. Eg hadde meir og meir lyst på appen sjølv, fortel han.

På turane dukka det mellom anna opp eit ynske om å leggja til ulike bragder i appen. Til dømes å gå fem turar på éin dag, eller å gå tur i femti ulike kommunar. Inspirasjonen kom frå dataspel der ein skal oppnå ulike mål.

– Då vert det litt meir leik ut av det, fortel Byrkjeland.

Mange av turane i appen er godt merkte med både skilt og raude T-ar.

I tillegg ville Byrkjeland digitalisera lokale turkampanjar. Ifølgje han har Øystesetrimmen pågått så lenge han kan hugsa, så no var det på tide å kunna samla poeng på mobilen.

– Eg måtte berre sjå om eg fekk til å laga ein app fyrst, seier kvemmingen.

På dagtid gjekk han ut på tur for å grubla og planleggja. Deretter bar det heim i stova for å programmera. Byrkjeland gjorde alt sjølv, og fordi han aldri hadde laga ein mobilapp før, var det ein heil del å læra seg. Det melde seg eit par vanskelegheiter undervegs, men Byrkjeland fann ut av det. Han nytta sommaren godt, og etter eit par veker var fyrste versjon av Postkassetrimmen klar til lansering.

Spreidde seg raskt

– Appen har utvikla seg etter kvart som eg har lært meg meir. Det er ein kjekk hobby som eg kan bruka litt tid på å vidareutvikla, fortel Byrkjeland.

Han forklarer at slik er det med IT-system. Alt må vedlikehaldast og ein vert liksom aldri heilt ferdig. Både mobilane og teknologien endrar seg stadig. Då må Postkassetrimmen halda følgje.

I starten delte han appen med vener og familie. Utanom eit innlegg på Facebook vart han ikkje marknadsført noko særleg. Ifølgje Byrkjeland spreidde ordet seg med bruken. Han hadde ikkje førestilt seg kor populær appen kom til å verta. I dag har Postkassetrimmen rundt 18.000 registrerte brukarar. Byrkjeland får stadig ros for arbeidet.

Mats Byrkjeland arbeider med programmering i Oslo, men er heime på sommarferie i Hardanger. – Eg må jo ha litt fjord og fjell, seier han.

– Det er kjekt å høyra at så mange set pris på appen. Eg får mange gode ord frå brukarane, og det gler meg at Postkassetrimmen bidreg til å få folk ut i naturen, fortel kvemmingen.

Brukarane har moglegheit til å senda inn ynske om nye bragder og turmål. Sidan 1. juni i år har det kome heile tre hundre turforslag. I starten måtte Byrkjeland plotta inn alle koordinatane manuelt. No er det brukaren si oppgåve. Deretter må Byrkjeland godkjenna turmålet før det vert offisielt.

– Det er kjekt at folk engasjerer seg, fortel Byrkjeland.

Familieaktivitet

Sjukepleiar Hilde Kleven Eide bur i Norheimsund saman med mann og to born. Familien er glad i å vera ute og har teke i bruk Postkassetrimmen. Eide tykkjer det er mange fine turmål rundtom.

– Eg prøver å finna roa når eg er ute i naturen. Og så er godt å bevega seg litt, seier ho.

I fjor oppdaga Eide at det går an å laga familieprofil på Postkassetrimmen. Då kan ungane hennar ha sin eigen profil på hennar brukar, slik at dei òg kan «sjekka inn» på tur.

Frå venstre: Isak (5), Sverre (8), Hilde Kleven Eide og Andreas Eide. Her er dei på toppen av Geitafjell.

– Appen gjev motivasjon til å koma fram. Det er stas å sjekka inn når ein har nådd målet. Av og til vert det nesten krangling om kven som skal få gjera det fyrst, fortel Eide.

Ho tykkjer appen fungerer veldig fint. Det er mellom anna praktisk at det står kor mange meter det er igjen til målet. Familien har også nytta Postkassetrimmen for å finna turar når dei er på reis eller står i ferjekø.

– For min del handlar det ikkje om å få flest innsjekkingar, men å oppdaga nye stader, seier Eide.

Treng drivstoff

Gutane, derimot, vil gjerne ha så mange innsjekkingar som mogleg. På ein telttur i sommar måtte dei innom så mange toppar som mogleg. Sverre (8) har alltid med seg donaldpocket i sekken og kosar seg med lesing. Isak (5) likar å leita etter småkryp med forstørringsglas. Båe tykkjer det er kjekt å sova i telt.

– Så lenge det ikkje vert mykje snorking, understrekar Sverre.

Familien Eide har funne seg ein teltplass med god utsikt over fjorden.

Korleis er det å få ungane med på tur?

– Det har eigentleg gått veldig lett, seier Eide.

– Det er fordi du lokkar oss med godteri! seier Sverre.

Eide innrømmer at ho nyttar lokkemiddel av og til. Eller «bensin», som dei kallar det: sjokolade eller små premiar som gjev ekstra energi undervegs. Sverre synest det er kjekt å oppnå ulike mål og bragder på Postkassetrimmen. Han drøymer om å nå ein spesiell topp.

– Eg har ikkje lyst til Torefjell, eg har lyst til Galdhøpiggen!

Sverre og Hilde Kleven Eide klatrar opp mot Myklavatn.

På topp

Arne Vik bur i Norheimsund, arbeider med bygging av kraftliner og er truleg ein over snittet aktiv turgåar. Han ligg på fyrsteplass på nesten alle lister i Postkassetrimmen: flest turar, fjell, høgdemeter og bragder. Etter at Vik lasta ned appen i 2019, har det berre gått oppover.

– Det balla på seg med fleire og fleire turar. Konkurranseinstinktet har slått inn, fortel Vik.

Han går oftast aleine, men tykkjer også det er kjekt å ha med seg andre. Så sant dei held same tempo. I fjor gjekk Vik sin lengste tur: over 19 timar med 45 innsjekkingar. Kvemmingen har gått i alle fylka i landet og i 58 ulike kommunar. Favorittfjellet i Kvam er Torefjell.

– Det er ein relativt kort tur med flott utsikt, seier Vik.

Ifølgje Vik treffer han mange kjekke folk i naturen, og han likar å slå av ein prat. Hans råd til andre som ynskjer å koma seg ut på tur, er å ikkje starta med for lange turar eller å gå for fort.

– Det er tungt om ein vert «sprengd», seier han.

Utsikta frå Skrott på ein av turane til Arne Vik.
Laga med Labrador CMS