Jakt og fiske-boom under korona

Interessa for Jakt og fiske har eksplodert under koronapandemien. Den ferske jegeren Astrid Solhjell trur pandemien var med å påverke henne til å byrje med jakt.

– Eg byrja med jakt fordi eg i fjor haust blei veldig interessert i det. Eg har vakse opp i ein familie med ein far som driv med jakt, men interessa kom eigentleg ikkje for fullt før i fjor, seier Astrid Solhjell til Nynorsk pressekontor.

17-åringen frå Eresfjorden i Molde kommune byrja med jakt like etter pandemien kom til Noreg og no er ho hekta.

– Eg skal gå til innkjøp av eiga rifle, fortel ho.

Enorm interesse

Solhjell er langt frå den einaste som har funne gleda i jakt i koronatida. Norges Jeger- og Fiskerforbund (NJFF) fortel om ein stor medlemsvekst det siste året.

– Vi har hatt ein vekst på cirka 6000 medlemmer det siste året. Det er trass i at vi ikkje har greidd å gjennomføre alle dei lokale arrangementa som vi hadde ønskt. Det har vore vanskeleg å gjennomføre kurs, skytebanetrening, samlingar, familiedagar, ungdomscampar og anna grunna restriksjonane. Likevel opplever vi tilstrøyming til organisasjonen vår og det vi står for. Det synest vi er positivt, seier informasjonssjef Espen Farstad i NJFF til Nynorsk pressekontor.

Farstad trur koronapandemien har vore ei direkte årsak til auka interesse.

– For oss så verkar det slik at koronapandemien i alle fall har ført med seg noko godt- nemleg at folk har oppdaga verdien av norsk natur. Det har vore mykje folk ute og mykje rørsle i skog og fjell, seier han.

Litt færre jaktprøver

Trass at interessa for jakt har vore stigande det siste året har færre teke jaktprøva ein treng for å drive jakt i norsk natur. Ifølgje Farstad speglar ikkje den nedgangen interessa for å ta prøva.

– Årleg er det 10-12.000 prøvekandidatar på jaktprøven. I fjor var prøva vanskeleg å gjennomføre grunna restriksjonane. Trass det såg vi at lokallaga våre var flinke med gjennomføring og vi enda opp med ein nedgang på berre 18 prosent i gjennomførte prøver samanlikna med året før, seier informasjonssjefen.

– Vi hadde forventa ein mykje større nedgang. Ein ordentleg dropp, legg han til.

Ein mogleg salsauke

Jaktia Bergen er ein av dei største leverandørane innan våpen og jaktutstyr på Vestlandet. Dei har merka eit endra salsmønster det siste året.

– Det har kanskje vore ein liten auke i salet av jaktvåpen i fjor, men ikkje noko vesentleg. Det vi har selt mykje meir av er kvalitetsoptikk. og det har vel samanheng med at folk bruker pengar på dette i staden for ferie, skriv Arnt Aasheim ved Jaktia i ein mail til Nynorsk pressekontor.

Han har ikkje inntrykk av at fleire ferske jegerar har gått til innkjøp av våpen det siste året og set det i samanheng med at færre fekk moglegheit til å ta jaktprøva.

Fleire fiskar

Det er ikkje berre jaktinteressa som har eksplodert det siste året. Også interessa for fiske har fått ein oppsving.

– Mange har gått i boden for å finne fiskestonga. Noko som ført til ein formidabel auke i fiskekortsalet. Nokon snakkar om ei dobling samanlikna med tidlegare år. Uansett har det vore ein veldig vekst, seier Farstad i NJFF.

I tillegg til jakt driv òg Astrid Solhjell med fiske. Ho meiner pandemien har vore ein god periode å pleie friluftsinteresser som nettopp jakt og fiske.

– Friluftslivet har ikkje vorte spesielt påverka av pandemien. Så eg har kunna pleia friluftsinteressene mine som normalt, avsluttar Solhjell.