Isbanar er flittig i bruk

På Tørvikvatnet er det moka for ein langløpbane og for ishockey. Dessutan er det is på Eidesvatnet.

— Eg har ikkje sjekka der. Det frys litt seinare, seier Måkestad.

Skårsvatnet mellom Soldal og Porsmyr var det som vart trygt fyrst og trekte til seg store mengder folk tidleg i januar, før snøen kom. Det er moka ein runde der, opplyser nabo Hilde Saxsæter.

Også på Fitjadalsvatnet er isen trygg så lenge ein held seg unna elveosane, seier Torstein Fosso i Fitjadalens vener.

HF gjer merksam på at ein bør kontrollera istjukna før ein går ut på isen.

Rekord på 24 sekund

— Det har vore stor bruk av rulleskeisebanen og Tørvikvatnet, seier Måkestad.

Skeiseklubben planla ein konkurranse i Vikøy torsdag, men denne måtte ein utsetja på grunn av koronatiltaka som vart innførte dagen før.

— Det er svært positivt for oss med denne vinteren, og det lovar godt, seier Måkestad.

Han seier det stadig kjem både nye og tidlegare utøvarar til banane. Dei som har trena mest, har hatt stor framgang. På rulleskeisebanen var det jamn trening to gonger i veka før koronapandemien. Den siste treningskvelden før koronaen var det 20 born på banen.

Flying start-rekorden — altså start med fart — i Vikøy har Måkestad sjølv, på 24,0 sekund. Den beste fasttida er også hans, på 27,6 sekund.

— Du har teknikken på plass?

— Ja, den held, etter mange år.

Brøyter og vatnar

Klubben sprøyter på meir vatn etter kvart i Vikøy, frå ein 1.000 liters tank. Cato Kjøsnes køyrer med bil og vatnar når det er behov for det. Også Tom Christian Storli har hjelpt til med å brøyta rulleskøytebanen med firehjuling når det har kome snø.

— Me har hatt is i fem veker. Kvar trenar for seg. Det er ikkje konkurransar og ikkje fellestreningar, men me kjem til å arrangera treningar og konkurransar så snart styresmaktene opnar for det att, seier Måkestad.

Dei eldste har ikkje kunna vore med på konkurransar på lenge.

Klubben hadde planar om å konkurrera på Slåtthaug kunstisbane i Bergen, men då var det berre klubbmedlemer som fekk gå konkurransar der.

— Butikkane har gått tomme for skøyter. Det har vore stor aktivitet både på skøyter og ski no i dette vakre vintervêret, seier han.

På varsom.no kan ein læra meir om islagde vatn.