Inviterer til Gaza-markering
LO ønskjer å syna kva organisasjonen meiner om krigen i Gaza. Torsdag inviterer lokallaget til markering i Øystese.
Håvard Gjerde, leiar i LO i Kvam, fortel at Jorge Dahl, som er tillitsvald i Fellesforbundet, Sarifa Moola-Nernæs og kvammaordførar Torgeir Næss vert innleiarar.
– Dahl er invitert fordi han har vore engasjert i Norsk Folkehjelp i ei årrekkje. Moola-Nernæs er invitert fordi ho har jobba med flyktningar i mange år, fortel Gjerde.
Ifølgje Gjerde har LO ved fleire høve gjort det klart kva arbeidstakarorganisasjonen meiner om krigen.
– Både regionalt og nasjonalt har me vore klinkande klare i fordømming av bombinga og blokaden, som tek hundrevis av sivile liv dagleg. Markeringa er både ein protest mot krigen, men samstundes ein måte å visa medkjensle med offera på. Eg trur mange har behov for å visa sympati, seier Gjerde.
Stig Lundblad-Sandbakk og Katrine Helgheim Van Tulder bidreg med eit musikalsk innslag.
Markeringa vert framfor Kunsthuset Kabuso. Den vert med faklar, men utan tog.
– Me bestemde oss for å ikkje gå i tog, men det vil verta delt ut faklar. Det treng ikkje folk ta med, seier Gjerde.
